Pak ditë më parë, kur Agim Cani, arriti marrëveshjen me dyshen drejtuese të KF Shkodra, Taip dhe Rudi Piraniqi, për të marrë presidencen e këtij klubi, deklaroi për Veriu Sport një sërë premtimesh me qëllim për ta shndërruar këtë klub në një nga më të mirët, jo vetëm në Shkodër e Veri, por edhe në shkallë kombëtare.
Dhe, hapat e parë janë konkret dhe padiskutim edhe shumë bindës, ku pas talentit të kombëtares U-15, Riad Syla, dhe trajnerit të AF Vllaznia, Denis Zmijani, sot, ka arritur marrëveshjen e bashkëpunimit edhe me një nga specialistët më të mirë të përgatitjes fizike në vend, Kryetrajnerin e Atletikës shkodrane, Albert Marashi!
Njoftimi zyrtar i KF Shkodra
KF.Shkodra forcon stafin teknik me një nga specialistët më të mirë të përgatitjes fizike në vend!
Përgatitja fizike përbën një nga komponentët thelbësorë në rritjen e cilësisë së stërvitjes dhe zhvillimin e performancës së futbollistëve. Në funksion të kësaj filozofie pune, KF Shkodra ka afruar pranë klubit Prof.Albert Marashi një emër me reputacion të lartë në fushën e atletikës dhe përgatitjes fizike.
Prof. Marashi është aktualisht kryetrajner i atletikës pranë Sport Klub Vllaznia, dhe njëkohësisht një nga figurat më të kualifikuara në këtë fushë. Ai ka përfunduar studimet në Institutin e Lartë të Kulturës Fizike “Vojo Kushi” në Tiranë dhe është pajisur me një sërë kualifikimesh profesionale në stërvitjen fizike, përgatitjen atletike dhe rehabilitimin sportiv.
Me një përvojë të gjatë dhe të suksesshme në punën me sportistë të niveleve të ndryshme, Prof. Marashi njihet për qasjen metodike, shkencore dhe moderne ndaj përgatitjes fizike. Ai do të angazhohet në mënyrë të drejtpërdrejtë për rritjen e kapaciteteve fizike të futbollistëve tanë, me objektiva të qarta: rritje performance dhe parandalim dëmtimesh
KF Shkodra i uron mirëseardhje Prof. Marashit dhe suksese në këtë bashkëpunim të ri në shërbim të zhvillimit sportiv dhe profesional të futbollistëve tanë.
