Pas tre ndeshjeve pa fitore në Superiore, Elbasani është rikthyer te suksesi duke mposhtur Bylisin me rezultatin 2-1 në “Elbasan Arena”.
Skuadra e drejtuar nga Ivan Gvozdenovic e nisi mirë ndeshjen dhe shfrytëzoi në mënyrën më të mirë epërsinë numerike pas daljes me karton të kuq të Brunos për miqtë.
Në minutën e 26-të, Diallo kaloi Elbasanin në avantazh me një goditje dënimi të saktë, ndërsa në minutën e 38-të, ai dyfishoi rezultatin nga pika e bardhë e penalltisë. Pjesa e parë u mbyll me shifrat 2-0 për vendasit.
Në pjesën e dytë, Bylisi u përpoq të reagojë dhe arriti të ngushtojë rezultatin në 2-1 me golin e Markut në minutën e 51-të, por nuk arriti të barazojë pavarësisht përpjekjeve.
Në minutat e fundit, Elbasani mbeti me një lojtar më pak, pasi Diallo u ndëshkua me karton të kuq pas një ndërhyrjeje të rrezikshme.
Pas kësaj fitoreje, Elbasani ngjitet në kuotën e 14 pikëve pas 8 javësh kampionat, ndërsa Bylisi mbetet me 6 pikë.
