Surprizë e pakëndshme për sulmuesin gjerman të Milanit, Niclas Fullkrug, i cili ka përfunduar në shenjestrën e hajdutëve. Këta të fundit i kanë bërë një “gol” prej 500 mijë eurosh, duke vjedhur sendet me vlerë të lojtarit në dhomën e hotelit.
Hajdutët kanë vepruar mbrëmjen e kaluar, në një hotel në Milano, ku është akomoduar përkohësisht futbollisti. Ata kanë hapur me forcë kasafortën dhe kanë marrë ora e bizhuteri, që kanë vlerën e rreth 500 mijë eurove.
Sulmuesi e ka kuptuar se dikush kishte hyrë në dhomën e tij sot në mëngjes. Organet kompetente kanë shkuar në vendngjarje dhe kanë hapur një hetim. Fullkrug, i cili është transferuar në Itali vetëm pak kohë më parë, përballet me një ngjarje aspak të këndshme, ndërkohë që pret të shfaqet protagonist me fanellën e Milanit.
