Në mbledhjen e sotme të zhvilluar në “Shtëpinë e Futbollit”, Komiteti Ekzekutiv i FSHF ka miratuar projektin “FIFA Arena”, një nismë që synon zhvillimin e infrastrukturës sportive dhe krijimin e më shumë hapësirave për futbollin e fëmijëve dhe të rinjve në Shqipëri.
Projekti do të realizohet në bashkëpunim mes FSHF-së, FIFA-s dhe bashkive përkatëse, me synimin për të krijuar ambiente të përshtatshme ku fëmijët dhe të rinjtë të kenë më shumë mundësi të luajnë futboll dhe të zhvillojnë aftësitë e tyre sportive.
Në kuadër të këtij projekti, janë identifikuar tri vendndodhje për ndërtimin e fushave të reja të futbollit: shkollat “Dora d’Istria” dhe “Vasil Shanto” në Tiranë, si dhe Parku Rekreativ i qytetit të Kavajës.
Në bazë të modelit të bashkëpunimit, bashkitë përkatëse do të kujdesen për përgatitjen e bazamentit të fushave, ndërsa FSHF, nëpërmjet projektit “FIFA Arena”, do të mundësojë shtrimin e tapetit artificial, vendosjen e sistemit të rrethimit dhe instalimin e portave të futbollit, në bashkëpunim me FIFA-n.
Përmes projektit “FIFA Arena”, FSHF vijon angazhimin për zhvillimin e futbollit të bazës dhe krijimin e kushteve më të mira për brezat e rinj, duke forcuar bashkëpunimin me institucionet vendore dhe FIFA-n për të sjellë futbollin më pranë komuniteteve.
