Tirana-Vllaznia 98-100 (30-25, 20-21, 22-18, 26-36)
ormacioni i Vllaznisë: Aaron Njike, Jarius Jathniel Shumpert, Redi Rakaj(C), Elian Memçaj, Sead Kopliku, Rajen Mbiara, Dren Hafizi, Edon Kuçi, Antonio Shabani, Veton Gjeçaj, Elidon Bitri. Trajner: Damian Bekteshi
Kampionati Kombëtar i Superligës në basketboll meshkuj luajti fundjavën e kaluar, ndeshjet e javës së nëntë. Kalendari i rezervoi Vllaznisë të luante në transfertë me ekipin e Tiranës.
Një ndeshje kjo e një rëndësie të veçantë për skuadrën kuqeblu, pasi duke ardhur pas tetë humbjeve radhazi në kampionat dhe vendi i fundit në tabelën e klasifikimit, kërkohej patjetër reagimi në kërkim të fitores së parë.
Dhe, reagimi i parë pozitiv vjen pikërisht në këtë javë ku skuadra kuqeblu regjistron fitoren e parë pas nëntë javëve kampionat. Djemtë kuqeblu të drejtuar nga trajneri Damian Bekteshi, mes të cilëve edhe tre basketbollistët amerikanë, kanë mundur Tiranën me rezultatin 98-100.
Rivaliteti i këtij dueli ka qënë shumë i madh, duke sjellë jo pak emocione gjatë të gjithë periodave të takimit. Bardheblutë e kanë nisur më mirë, teksa fitojnë periodën e parë me shifrat 30-25, ndërkohë që në periodën e dytë është Vllaznia që fiton 20-21, por që në pushimin mes dy pjesëve, Tirana kryeson 50-46.
Vendasit, vijojnë të jenë në avantazh edhe në periodën e tretë, ku pas fitores së këtij fraksioni 22-18, kryesojnë me rezultatin 72-64. Por, ajo që vendos përfundimisht është perioda e katërt, aty ku Vllaznia fiton me dhjetë pikë diferencë, 26-36, duke arritur të përmbysë rezultatin në favorin e saj 98-100.
Fitore kjo, që krahas të tjerëve, ka kontributin e amerikanit Smith, si dhe të talentit shkodran, Elian Memçaj, të cilët spikatën si pikëshënuesit më të mirë të ndeshjes, i pari me 29 dhe i dyti me 23 pikë.
Fitorja ndaj Tiranës në transfertë është hap pozitiv për Vllazninë, por pozita e saj në tabelën e klasifikimit vazhdon të jetë në vendin e fundit të renditjes. Çka, për të dalë nga kriza e përfshirë si asnjëherë tjetër, duhet të shoqërohet edhe me fitore të tjera për të shmangur rënien nga kategoria Superiore.
