Ndonëse gjatë ecurisë së këtij sezoni futbollistik, Vllaznia U-17 paraqiti një skuadër zhgënjyese në lojë dhe rezultat duke humbur çdo shpresë për renditjen në katër ekipet më të mira të zonës Play-Off, javët e fundit ka një zgjim surprizë nga kjo skuadër. Sidomos me fitoren në transfertë të javës së 24-të ndaj Partizanit, skuadra e drejtuar nga Brikeno Bizi dhe Nefail Zhejani ka shtuar jashtë mase shpresat e realizimit të objektivit për t’u përfshirë në katër ekipet më të mira të zonës Play-Off dhe më pas, pse jo për të luftuar edhe më tej drejt trofeut.
Spektakël kuqeblu është konsideruar ajo çfarë paraqitën 17 vjeçarët e Vllaznisë në përballjen me Partizanin në transfertë. 4 gola, njëri më i bukur se tjetri ka dhuruar kjo ndeshje, ku që të katër janë pronë e Vllaznisë. Autorët që tundën rrjetën e Partizanit janë Matija në minutën e 10’, Zaganjori në të 40’, Cungu me panallti në të 87’, ndërkohë që goli i dytë në portën e Partizanit ka ardhur me një autogol të të kuqve me autor Vidrica në minutën e 33’.
Vllaznia U-17 në këtë ndeshje aktivizoi këtë formacion: Jukaj, Maliqi(Brahimi 80’), Repaj, Cungu, Boshti, E. Selmani(Gjolaj 71’), Talani(Gjondreka 61’), Matija9’ Palali 58’), Dodaj, Zaganjori, Muhaj. Trajner Brikeno Bizi.
Me këtë fitore, Vllaznia U-17 është ngjitur në kuotën e 22 pikëve duke mbajtur vendin e pestë, vetëm dy pikë më pak se sa Tirana e vendit të katërt, ndërkohë që Grupin A e kryeson Shënkolli, Shkëndija e Tiranës dhe Internacional me nga 35, 30 dhe 29 pikë.
Kalendari për javën e 25-të ofron një përballje shumë të fortë për Vllazninë U-17, pasi do të përballet me ekipin kryesues të kampionatit, Shënkollin, ndeshje kjo që do të luhet të shtunën në stadiumin “Reshit Rusi” të Shkodrës” duke filluar nga ora 11.00.