Ildi Gruda ka qenë protagonist absolut i ditëve të fundit në futbollin shqiptar. Fillimisht me kalimin e papritur te Egnatia, pas një gabimi të Vllaznisë që nuk aktivizoi rinovimin e kontratës së tij për një tjetër sezon. Një kalim që u pasua me polemika të shumta mes palëve.
Por ai u bë protagonist edhe në fushën e lojës, teksa në debutimin me rrogozhinasit, u dha fitoren këtyre të fundit në ndeshjen e Ligës së Kampioneve ndaj Breidablik. Në prononcimin e tij pas ndeshjes, Gruda ka shmangur polemikat, teksa ka uruar shkodranët për një kualifikim të mundshëm në Ligën e Konferencës.
Premiera me gol…
Ishte ndeshje shumë e rëndësishme, ndeshje e luftuar dhe në fund ia dolëm.
E prisnit ta nisnim me gol aventurën me Egnatian?
Të tregoj të drejtën besova shumë se do shënoja dhe ia arrita qëllimit.
Për kë shkon ky gol i parë?
Ky gol shkon për familjen time.
Sa e rëndësishme është kjo fitore edhe për ndeshjen e kthimit?
Shumë e rëndësishme se kemi një gol avantazh dhe atje shkojmë përsëri për fitore.
Diçka për polemikat në aksin Shkodër-Rrogozhinë për ardhjen tuaj këtu?
Jo, s’kam asnjë koment për këtë.
A kualifikohet Vllaznia?
Shpresoj që po.
Vladimir MEMA
