Vllaznia U-17 me trajner Edmond Doçin dhe Denis Zmijanin është finaliste Kupës së Shqipërisë në futboll për moshat, finale që do ta diskutojë me skuadrën private të akademisë durrsake, Durrësi 04. Në një prononcim për Veriu Sport, tekniku Doçi shprehet i kënaqur me ecurinë e skuadrës së tij për të cilën vlerëson lojën e djemve të talentuar që ka në formacion. Për të shkuar në finale, Vllaznia eleminoi tre kundërshtar, ndër të cilët padyshim më i vështiri ishte ekipi kryesues i kampionatit, Internacional i Tiranës. Në pritje të finales Vllaznia-Durrësi 04, 17 vjeçarët kuqebu vazhdojnë përgatitjet intensive, ndërkohë që trajneri Doçi premton se skuadra që ai drejton me kolegun Zmijani do të luftojë fort që trofeu i Kupës të vijë në Shkodër.
Një skuadër e cila nisi mjaft mirë në turin e parë dhe mbërriti tashmë në finale, një sukses i merituar kjo arritje
Faleminderit, por dua të theksoj që kjo arritje është meritë e ekipit sepse ato fëmijë janë përditë e në rritje. Unë dhe trajneri Denis Zmijani kemi pasur besimin e plotë që këto fëmijë kanë për të arritur aty ku duhet dhe asnjëherë nuk kemi ndaluar punën duke u marrë gjithmonë e më shumë me to. Dhe gjëja më kryesore që ne kemi synuar me këtë skuadër është që të bëhen një grup i mirë si një familje, të krijojnë një ekip që fitojnë respektin e kundërshtarit sepse në këtë mënyrë ka nivel dhe cilësi dhe pastaj të mësojnë të luajnë futboll. Arritjet padyshim që na gëzojnë, por ajo që na gëzon më shumë është mënyra se si grupi është duke funksioniuar. Është një grup që është duke u formuar dita ditës dhe janë lojtarë që në radhë të parë janë fëmijë shumë të edukuar dhe e kanë me shumë pasion futbollin. Ne dhe i gjithë stafi i Akademisë Vllaznia e kemi arritur atë që kemi dashur.
Keni kaluar tre ture me skuadra të ndryshme por padyshim eleminimi i skuadrës kryesuese Internacional ka qenë arritja më e madhe
Të them të drejtën shorti u tregua pak mizor dhe besoj që skuadrat që ne kemi luajtur meritonin të ishin finaliste sepse janë ato ekipe që kryesojnë kampionatet e moshave. Ndeshja e parë me Shoqatën Pepa ishte ajo më e vështira për mua sepse Kupa është një format tjetër dhe fëmijët futen me emocione dhe nuk dalin gjithmonë në lojën e tyre. Pastaj përsëri shorti qëlloi me një skuadër si Internacionali që është në vendin e parë në grupin tonë, një skuadër që di të luajë futboll dhe e kam theksuar gjithmonë që është një ndër skuadrat më të mira të Kampionatit të moshave dhe kam dëshirë që të arrij edhe unë një skuadër të tillë me ekipet që punoj. Pas kësaj ndeshje na qëlloi me Apoloninë e Fierit që ka një element që po i funksionon shumë mire, madje në formacionin e skuadrës kundërshtare u aktivizuan edhe futbollistë që luajnë me ekipet U-19 dhe U-21.
Tashmë është finalja përballë ekipit të Durrësit 04, një ekipi të ri të mirëorganizuar dhe me pretendime. Si po përgatitet kjo finale?
Ne po shohim që Akademitë private po mundohen të bëjnë maksimumin sepse konkurenca është shumë e fortë. Durrësin 04 nuk e njoh shumë mirë, por mendoj që ka një grup të mirë. Pavarësisht që mund të themi që është një ekip më i lehtë, gjithsesi është një ekip i ri dhe kanë bërë maksimumin për të arritur në finale kështuqë pretendoj tek lojtarët e mi që të vlerësojnë çdo ndeshje, po i toleruan ndeshjet zbresin në nivelin e skudrave të tjera. Puna që kanë bërë më së miri deri tani sportisët e Akademisë Vllaznia U-17 është vlerësimi maksimal i ndeshjeve duke arritur aty ku duhet.
Do të vijë Kupa në Shkodër?
Ndeshjet kanë emocionet e veta dhe shpresoj që atë ditë të jemi në nivelin e duhur dhe të shprehim atë që duam në mënyrë që kur të dalim pas ndeshjes, të dalim me një lojë që të ketë lezet ta shohin edhe shikuesi, pasi ka për tu transmetuar drejtpërdrejtë në TV. Në këtë mënyrë dalim fitues sido, sikur të dalim me trofe padyshim që do ishte edhe më mirë.
Faleminderit dhe suksese!
Faleminderit ju!
