Kualifikimi i Vllaznisë në turin e dytë të UEFA Conference Leagu ka krijuar një klimë shumë pozitive në kampin kuqeblu, gjë e cila pritet të shpërblehet me një paraqitje tjetër dinjitoze edhe në duelin e javës së ardhshme përballë islandezëve të Vikingurit.
Ashtu siç kishin deklaruar më herët presidenti Alban Xhaferi dhe trajneri Edi Martini, Vllaznia është e hapur në merkato edhe për dy-tre lojtarë cilësor që pritet ta përforcojnë skuadrën edhe më shumë.
Burime pranë klubit kuqeblu bëjnë të ditur, se përforcimi i radhës është portjeri gjergjan, Leon Pohls. Një portjer ky me një karrierë të pasur sportive, kryesisht në Irlandë ku është shpallur katër herë kampion me ekipin Shamrok.
Nga sa mësohet, shtatlarti 1.94 metra Leon Pohls, gjendet në Shkodër prej disa ditësh, ku procedurat e kontratës me të janë kryer që para nisjes së Vllaznisë drejt Letonisë, por për efekt të dorëzimit të listës së federimit për ndeshjen e parë europiane ka qënë e pamundur të përfshihej në planet e sfidës me Daugavpils.
Tashmë, me zyrtarizimin e kontratës së tij me kuqeblutë, emri i 28 vjeçarit Leon Pohls, është përcjellë menjëherë që mbrëmjen e së premtes në institucionin e UEFA-s në përbërje të listës së federimit të Vllaznisë për ndeshjen e turit të dytë kundër Vikingur të Islandes.
Prezantimi zyrtar me uniformën e KF Vllaznia, portjeri gjerman Pohls, do ta ketë paraditen e së shtunës në mjediset e stadiumit “Loro Boriçi”, dhe më pas do të vihet menjëherë në dispozicion të trajnerit Edi Martini duke u përfshirë në seancën e parë stërvitore të kuqebluve në përgatitjet anti -Vikingur.
