Vllaznia ka lënë pas fitoren 3 me 1 të klasikes ndaj Tiranës për javën e 26-të të Abissnet Superiore dhe tashmë është e përqëndruar për kompeticionin e Kupës së Shqipërisë, i cili rikthehet në mesjavë me ndeshjet e dyta të turit çerekfinal.
Kuqeblutë presin në stadiumin “Loro Boriçi” Bylisin e Ballshit, takim i cili është programuar të nisë në orën 16:30. Vllaznia, vjen në këtë ndeshje me avantazhin e përballjes së parë, ku në stadiumin “Adush Muçaj” të Ballshit doli fitues me rezultatin 0 me 1 me golin e shënuar nga Lirim Kastrati në minutën e 28-të nga pika e bardhë e penalltisë.
Në këtë mënyrë, duke parë avantazhin e ndeshjes së parë në transfertë, në pamje të parë Vllaznia është e favorizuar për ta kaluar turin, por gjithësesi në kampin kuqeblu ka vlerësim maksimal për ndeshjen e kthimit duke pasur objektiv kalimin e turit, si dhe më tej edhe fitimin e trofeut të Kupës së Shqipërisë.
Nga e mërkura e Kupës së Shqipërisë, Vllaznia në fundjavë do të udhëtojë në Vlorë për t’u përballur me Flamurtarin vendas në kuadrin e javës së 27-të të Abissnet Superiore, takim i planifikuar të luhet në orën 18:00.
Ndërkohë, për javët në vazhdim të kategorisë Abissnet Superiore, Federata Shqiptare e Futbollit ka zyrtarizuar kalendarin edhe për dy javët e tjera në vazhdim. Kështu, për javën e 28-të, Vllaznia do të luajë përsëri në transfertë, këtë radhë në Rrogozhinë përballë ekipit vendas Egnatia, takim i programuar të luhet të premten e 13 marsit duke filluar nga ora 19:00.
Pas dy transfertave në Vlorë dhe Rrogozhinë, Vllaznia kthehet të luajë në shtëpi për javën e 29-të dukë pritur në stadiumin “Loro Boriçi” Dinamon , takim që do të luhet të martën e 21 marsit duke filluar nga ora 19:00.
