Abissnet Superiore, vijon sot me dy ndeshjet e radhës, Laçi-Bylis dhe Partizani-Erzeni, të cilat janë të fundit për javën e katërt. Çifti i parë i ditës së sotme është ai që do të luhet në stadiumin e Laçit në orën 15:00, aty ku tifozët kurbinas kërkojnë reagimin e skuadrës së tyre, e cila pas tre javëve kampionat ka mbetur në kuotën e tre pikëve duke mbajtur vendin e tetë në renditje. Përballë do të ketë mallakastriotët, të cilët edhe pse debutues në tre javë kanë grumbulluar 4 pikë duke qënë me një pikë dhe me një vend më sipër se Laçi.
Po sot, por në orën 17:45, Partizani kryesues me 9 pikë të plotë pret Erzenin simpatik, i cili për momentin është në vendin e gjashtë me 5 pikë, por nëse merr pikë sot ndaj të kuqve mund ngrihet më lart në renditje.
Duelet e kësaj jave kanë nisur që të premten me barazimin Teuta-Kukësi 0-0, rezultat që largoi nga drejtimi trajnerin e Kukësit, Skënder Gega. Ndërkohë, që dita e djeshme, përpos barazimit pa gola në Kamzë mes Kastriotit dhe Tiranës, rezultati më i bujshëm ishte ai i regjistruar në “Arena Egnatia” ku rrogozhinasit shpartalluan Vllazninë duke e mundur thellësisht me rezultatin 3-0.
Në prittje të rezultateve të ndeshjeve të sotme, renditjen e përkohshme të Abissnet Superiore e kryeson Partizani me 9 pikë. Në vend të dytë dhe të tretë janë Egnatia dhe Vllaznia me nga 6 pikë, për të vijuar me Kastriotin, Tiranën dhe Erzenin që ndaj vendet e katërt, pestë dhe të gjashtë me nga 5 pikë secila.
Bylisi është i shtati me 4 pikë, për të vijuar me Laçin dhe Teutën me nga 3 pikë që mbajnë vendin e tetë dhe të nëntë duke lënë në fund Kukësin me vetëm 2 pikë.
Superiore-Java e katërt
Të premten
Teuta-Kukësi 0-0
Të shtunën
Egnatia-Vllaznia 3-0
Kastrioti-Tirana 0-0
Sot
Laçi-Bylis 15:00
Partizani-Erzeni 17:45
