Kampionia e Kosovës, Drita, ka shkruar histori të enjten mbrëma në Differdange të Luksemburgut. Skuadra gjilanase mposhti kampionin e Luksemburgut, Differdange, me rezultat 1:0, duke siguruar vendin në fazën e ligës në UEFA Conference League, e cila i garanton gjashtë ndeshje me kundërshtarë të ndryshëm.
Faza e ligës e ka zëvendësuar fazën grupore në garat evropiane për klube që nga edicioni i kaluar. Drita bëhet skuadra e dytë kosovare që arrin një sukses të tillë, pas Ballkanit, por e para që garon në një format të tillë në garat evropiane.
Në ndeshjen e parë të “play-off”-it, të zhvilluar në “Fadil Vokrri”, Drita kishte fituar 2:1, ndërsa fitorja 1:0 në Luksemburg konfirmoi kualifikimin historik.
Goli vendimtar u shënua në minutën e 62-të nga Besnik Krasniqi, nga pika e bardhë, pas ndërhyrjes së palejuar në zonë ndaj Veton Tushës, e cila u konfirmua pas rishikimit në VAR.
Ndeshja nisi me një avantazh për Dritën, pasi që në minutën e tretë, Andreas Buch i Differdange u ndëshkua me karton të kuq direkt për një ndërhyrje të rrezikshme ndaj Raddy Ovoukan. Pjesa e parë përfundoi 0:0, me një goditje në shtyllë nga Ilir Mustafa. Në pjesën e dytë përveç golin vendimtar, Drita pati edhe disa raste të tjera. Mirëpo, në fazën e fundit të ndeshjes spikati edhe portieri Faton Maloku, i cili me disa ndërhyrje të shkëlqyeshme nuk lejoi që skuadrës së tij t’i rrezikohet kualifikimi historik.
Kundërshtarët e fazës së ligës skuadra e drejtuar nga Zekirija Ramadani do t’i mësojë në shortin që do të tërhiqet të premten.
