Në vijim të zhvillimeve të fundit në lidhje me qeverisjen dhe proceset vendimmarrëse në FIFA gjatë javëve të fundit, UEFA, AFC dhe CONCACAF kanë publikuar një letër të përbashkët drejtuar familjes së futbollit.
Në këtë letër, tre konfederatat paraqesin qëndrimin e tyre mbi çështjet e ngritura së fundmi, duke vënë theksin te parimet e integritetit, transparencës, llogaridhënies dhe qeverisjes së mirë në futboll.
Më poshtë, letra e plotë e përbashkët e AFC, CONCACAF dhe UEFA-s:
Letër e hapur për familjen e futbollit
E dashur familje e futbollit,
Futbolli është pasioni më i madh i përbashkët në botë. Ai nuk i përket asnjë individi dhe asnjë institucioni.
Ai u përket lojtarëve, tifozëve, klubeve, federatave anëtare dhe çdo institucioni të ngarkuar me mbrojtjen e së ardhmes së tij.
Ndaj në këtë frymë, si konfederata që përfaqësojnë anëtarët e tyre, sot flasim kolektivisht.
Rritja gjatë dekadës së fundit ka qenë reale. Por ky përparim nuk ka qenë kurrë vepër e një individi të vetëm. Ajo ka qenë rezultat i punës së FIFA-s, Konfederatave, Federatave Anëtare dhe mijëra njerëzve që i kushtojnë jetën e tyre këtij sporti.
Zgjerimi i turneve, caktimi i Kupave të Botës FIFA 2030 dhe 2034, si dhe shpërndarja e burimeve për shoqatat, kanë qenë arritje të përbashkëta, të miratuara së bashku dhe të realizuara së bashku.
Kjo nuk ka të bëjë me paratë. Konfederatat tashmë kanë bërë thirrje për shpërndarjen me përgjegjësi të rezervave të mëdha ekzistuese të FIFA-s, për të forcuar më tej investimet në zhvillimin e Federatave Anëtare.
Nuk ka të bëjë me humbjen e mbështetjes nga ndonjë Federate Anëtare që e ka fituar atë, pavarësisht përpjekjeve për të përhapur frikë te anëtarësia jonë dhe për të sugjeruar të kundërtën. As nuk ka të bëjë me rishikimin e zgjerimit të garave, ndarjen e vendeve për Kupën e Botës apo vendimeve të tjera të marra kolektivisht. Këto vendime u morën së bashku dhe duhet të qëndrojnë në fuqi.
Kjo ka të bëjë me diçka më themelore: integritetin e lojës dhe integritetin e atyre që janë zgjedhur për ta udhëhequr atë.
Udhëheqja në futboll nuk është pronë. Nuk ka të bëjë me mbajtjen apo kërkimin e pushtetit për hir të pushtetit. Ajo është një detyrë shërbimi ndaj familjes së futbollit që ia ka besuar këtë përgjegjësi.
Kur besimi thyhet përmes mashtrimit, kur një individ e vendos veten mbi kolektivin që i ka besuar autoritetin, kjo detyrë është braktisur.
Letra e fundit e FIFA-s drejtuar Zëvendëspresidentëve të saj dhe 211 Federatave Anëtare pranon se janë bërë gabime gjatë procesit. Ajo e trajton këtë si një dështim komunikimi, ndërkohë që ajo që futbolli dëshmoi ishte një dështim gjykimi. Një propozim i paraqitur brenda një afati jashtëzakonisht të shkurtër, pa konsultim kuptimplotë dhe i shtyrë drejt një afati përfundimtar përpara se Shoqatat Anëtare të mund të shqyrtonin siç duhet kushtet e tij, nuk është rezultat i një neglizhence, por është rezultat i një skeme të hartuar për të kufizuar shqyrtimin dhe kontrollin.
Nuk u pranua se vetë propozimi ishte thelbësisht i gabuar. Ende nuk ka asnjë njohje se përpjekja për të shitur një interes në Kupën e Botës FIFA përbënte një dështim të thellë të gjykimit, jo thjesht një gabim procedural, por një shkelje themelore të besimit ndaj vetë institucioneve të cilave FIFA ekziston për t’u shërbyer.
FIFA është zotuar gjithashtu të paraqesë një raport të plotë mbi këto ngjarje në Këshillin e FIFA-s, duke dështuar sërish të njohë se qeverisja e duhur përballë një mungese kaq të thellë gjykimi do të kërkonte që një shqyrtim i tillë të kryhej nga një palë e tretë plotësisht e pavarur, dhe jo nga vetë FIFA, stafi i saj apo ndonjë palë tjetër e interesuar brenda futbollit. Administrata e FIFA-s nuk duhet të luajë asnjë rol në kryerjen e këtij shqyrtimi.
Siç është theksuar në korrespondencën e mëparshme, të gjitha dokumentet dhe të dhënat përkatëse duhet të ruhen në përputhje me komunikimin e UEFA-s mbi ruajtjen e dokumenteve.
Vetë letra e FIFA-s konfirmon gjithashtu se vetëm një zyrtar i zgjedhur ishte i pranishëm në takimin e drejtuesve në Marok. Asnjë anëtar i Këshillit të FIFA-s apo Shoqatë Anëtare nuk ishte ftuar të merrte pjesë. I pranishëm ishte vetëm komiteti drejtues, i përbërë nga drejtues të lartë të punësuar nga FIFA.
Ky takim i fundit, ku një numër i përzgjedhur anëtarësh të Komitetit Drejtues të FIFA-s dhe jo i gjithë Komiteti u thirrën jashtë vendit, në vend që drejtuesit të shkonin në Zyrih për të trajtuar në zemër të FIFA-s, me stafin e saj, çështjen kryesore, vetëm sa i përforcon këto shqetësime dhe përfaqëson një vazhdim të të njëjtit model sjelljeje që na ka sjellë deri në këtë moment.
Kjo nuk është sjellja e një kujdestari të lojës, por e dikujt që beson se loja duhet t’i japë llogari atij.
Ka heshtje aty ku duhet të ketë llogaridhënie, distancë aty ku duhet të ketë transparencë.
Këto nuk janë cilësitë që futbolli meriton nga drejtuesit e tij. Prandaj kemi marrë këtë qëndrim: jo lehtësisht dhe jo vetëm, por së bashku dhe në përmbushje të detyrës sonë ndaj sportit të cilit i shërbejmë.
Fuqia e futbollit ka qenë gjithmonë uniteti i tij. Ne bëjmë thirrje që ky unitet të nderohet tani, për një udhëheqje që i shërben futbollit dhe nuk kërkon ta sundojë atë.
Me respekt,
SALMAN BIN IBRAHIM AL KHALIFA
President i AFC-së
VICTOR MONTAGLIANI
President i CONCACAF-it
ALEKSANDER ČEFERIN
President i UEFA-s
DATUK SERI WINDSOR JOHN
Sekretar i Përgjithshëm i AFC-së
PHILIPPE MOGGIO
Sekretar i Përgjithshëm i CONCACAF-it
THEODORE THEODORIDIS
Sekretar i Përgjithshëm i UEFA-s
