Vllaznia U-21-Nacka FC 0-1(Shënues: Amad Adel 75’)
Stadiumi i dytë i Shkodrës, Reshit Rusi” priti sot një ndeshje ndërkombëtare, ku përballë Vllaznisë vendase të kategorisë U-21 ka qënë skuadra e kategorisë së katërt nga Suedia, Nacka FC. Një skuadër, kjo që, nga sa bëri të ditur shqiptari që jeton prej më se 30 vitesh në Suedi, Salih Shala, e ka kthyer në traditë të sajën zhvillimin e fazës përgatitore në Shqipëri. Ditë, të cilat klubi Nacka FC i shfrytëzon duke e testuar skuadrën në ndeshje miqësore, njëra prej të cilave ishte edhe kjo e sotmja me ekipin e Vllaznisë.
Gjithnjë, sipas shqiptarit nga Kosova, Salih Shala, i cili mban edhe pozicionin e drejtorit teknik të të kësaj skuadre, Nacka FC, është një ekip i themeluar nga vetë ai dhe familja e tij, e cila menaxhon përgjithësisht klubin në fjalë.
Madje, përmos stafit, i cili thuajse është tërësisht shqiptar, edhe në gjirin e skuadrës ka futbollistë shqiptar, mes të cilëve në ndeshjen e sotme ishte edhe shkodrani, Arbion Kurbasha, i cili me krosimin e saktë në anësore kishte meritë në golin e fitores që Amad Adel shënoi në të 75-tën minutë në favor të ekipit suedez.
Sa i përket kronikës së ndeshjes, pjesa e parë u mbyll në barazim, 0-0. Një pjesë kjo, ku trajneri shkodran i 21 vjeçarëve, Elvis Plori, aktivizoi kryesisht formacion e parë, ndërkohë që 45 minutëshin e dytë kishte hapësirë për një pjesë të mirë të lojtarëve të stolit.
Ndeshja në fjalë i ka shërbyer të dyja skuadrave për konsilidimin e lojës së tyre. Suedezëve për t’u rikthyer në kampionatin e tyre me një formë sa më të mirë sportive, si dhe nga ana tjetër, Vllaznisë i shërbeu për një testim final të skuadrës së saj në prag të ndeshjes së fundjavës, transfertën me Bylisin kryesues, padyshim ndeshja përcaktuese për fatin e titullit kampion, sepse ballafaqohen vendi i parë me të dytin.
(Video) Pamje nga ndeshja miqësore ndërkombëtare, Vllaznia U21-Nacka FC, 0-1
Gaspër MARKU
