Shqipëria U-19 ka fituar edhe ndeshjen e dytë miqësore të planifikuar ndaj Malit të Zi, me rezultatin 1-0.
Kuqezinjtë e drejtuar nga Armando Cungu zhvilluan një ndeshje të mirë, duke krijuar disa raste të mira shënimi.
Gjithçka u zgjidh që në pjesën e parë të takimit, pas një goditjeje dënimi nga ekipi ynë dhe gabimit të kundërshtarit malazez, që e dërgoi topin me kokë më rrjetën e tij, duke kaluar në avantazh kuqezinjtë.
Edhe në fraksionin e dytë të ndeshjes, skuadra e Cungut kontrolloi mirë lojën, duke krijuar rezultate dhe duke mbajtur të pandryshuar rezultatin deri në fundin e takimit.
Kjo ishte miqësorja e dytë për Shqipërinë U-19 në pak ditë, dy teste të mira që i shërbyen teknikut Cungu për të krijuar një ide përfundimtare mbi grupin e lojtarëve që do të përfaqësojnë Shqipërinë në kualifikueset e Kampionatit Europian 2022, ku skuadra jonë është shortuar në grupin 7, së bashku me Francën, Serbinë dhe Maqedoninë e Veriut. Ndeshjet do të luhen në Shqipëri në datat 10, 13 dhe 16 nëntor.
