Marrin fund vuajtjet e skuadrës kukësiane. Ekipi i Superiores së futbollit shqiptar, më së fundmi do të luajë në fushën e qytetit të tij duke shmangur kështu shtegtimin në stadiumit e tjera të Shqipërisë.
Drejtuesit e klubit kukësian bëjnë të ditur se punimet kanë përfunduar dhe tashmë gjithçka është gati për të pritur ndeshjen e parë zyrtare. E veçanta e këtij stadiumi që është emërtuar ‘Kukës Arena” ka të bëjë me faktin se tibunat e këtij stadium do të kenë emrat e disa prej figurave të njohura sportive të qytetit.
“Stadiumi i ri i cili pas pak kohësh do të presë më në fund skuadrën, do të mbajë emrin “Kukës Arena”. Investimi i bërë në stadium, e ka kthyer në një impiant modern i cili do të jetë edhe i gatshëm të presë ndeshjet e skuadrës sonë në Kupat e Europës, teksa ndeshjet mund të luhen edhe gjatë natës pasi stadiumi ka sistem ndriçimi.
Stadiumi “Kukës Arena” do të ketë emërtim të veçantë për secilën tribunë. Tribuna qendrore do të ndahet në dy pjesë dhe do të emërtohen
Tribuna “Zeqir Ymeri”
Tribuna “Gramoz Palushi”
Tribunat pas porte do të quhen:
Tribuna “Neim Hoxha”
Tribuna “Sadik Zeneli”
Tribuna përballë do të quhet
Tribuna “Shkëlzen Domi”
Punimet në fushën stërvitore po ecin me ritme të shpejta dhe në kujtim të futbollistit 17-vjeçar, i cili ndërroi jetë gjatë një ndeshje miqësore me të rinjtë e Kukësit, ky kompleks do të quhet “Kompleksi Stërvitore Ilirjan Thaçi””, thuhet në informacin zyrtar që KF Kukësi ka shpërndarë për median.
