Dita e hënë pritej t’u jepte rrugë zgjedhjeve në Asambletë e Shoqatave Rajonale, duke zgjedhur kryetarët e rinj si dhe emrat e atyre që më pas do të përfaqësonin shoqatat përkatëse në Asamblenë Zgjedhorë të FSHF-së. Një proces që ka nisur me akuza të rënda nga konkurrentët në garë në Shoqata të ndryshme dhe që është mbyllur pa filluar mirë.
Kjo pasi Asambleja e parë e caktuar për të hënën, ajo e Shoqatës Rajonale të Shkodrës, është shtyrë për një datë të pacaktuar, duke vendosur si shkak situatën me COVID.
“Shoqata Rajonale e Futbollit Shkodër njofton opinionin publik se është marrë vendimi për të shtyrë për një moment të dytë procesin e zgjedhjes së Kryetarit, për shkak të situatës së krijuar nga Covid.
Shoqata Rajonale e Futbollit Shkodër i ka komunikuar anëtarëve të saj se do të njoftohen në ditët e ardhshme për datën e re të zhvillimit të zgjedhjeve”, shkruhet në njoftimin që tregoi për shtyrjen e garës që sheh të luftojnë për postin e kryetarit kandidatët Lazër Matia dhe Kujtim Shaba, me këtë të fundit që ka akuzuar për parregullsi të procesit.
