Milan dhe Udinese luajnë të premte në 18:45 për javën e 27 në Serie A. Sfida është programuar në një orar delikat për tifozët, që kanë marrë një ftesë për të mbushur stadiumin San Siro, në kohën kur Ministria e Shëndetësisë në Itali ka hapur stadiumet në masën 75 përqind.
Sfida është e rëndësishme për Milan, që kërkon të jetë në krye të kampionatit. Klubi kuqezi ka vendosur edhe bileta me 1 euro për njëmbëdhjetë nga sektorët e stadiumit. Të gjithë tifozët që blejnë një biletë me çmim të plotë, kanë të drejtë të marrin edhe tre të tjera me çmim 1 euro, në zonat e caktuara.
Për personat nën 16 vjeç, biletat do kushtojnë 12 euro dhe 9 euro nëse tifozi shoqërohet nga një i rritur. Pritet që në San Siro të premte të jenë afro 57 mijë tifozë.
Rasti në fjalë ia vlen për t’u ndalur, pasi duket si një nismë shumë interesante, e cila mund të ndiqet edhe nga KF Vllaznia për ta eksperimentuar për ndeshje të veçanta brenda në stadiumin “Loro Boriçi” të Kategorisë Superiore.
