Ndonëse filloi me një super gol të Skukës duke kaluar Partizanin në avantazh, Tirana arriti të përmbysë disavantazhin duke e mbyllur me fitore derbin e kryeqytetit.
Bardheblutë fituan për vete duke siguruar titullin kampion për të 26-tën herë, tre javë para përfundimit të kampionatit, por në të njëjtën kohë, fituan edhe për Vllazninë.
Themi kështu, sepse me humbjen e Partizanit të vendit të tretë, kuqeblutë i vjen një shans i artë në dorë, që me një fitore të hënën ndaj Kukësit që mban vendin e katërt, pritet të shkojnë në vendin e tretë.
Përpos golit spektakël të Skukës shënuar në minutën e 20-të, ndeshja e zhvilluar mbrëmjen e së shtunës në “Elbasan Arena” paraqiti një Partizan diktues në fushën e lojës duke të dhënë idenë se do ta kalonte me sukses këtë derbi. Por, bardheblutë kundrapërgjigjen duke barazuar fillimisht me Seferin në minutën e 27-të, ndërkohë që për golin e avntazhit që rezultoi edhe goli i fitores erdhi përmes Totres dy minuta nga fillimi i pjesës së dytë.
Një penallti e dhënë në favor të Partizanit për rrëzimin në zonë të Skukës, mund ta kishte ndryshuar ecurinë e takimit, por edhe kryesori Hamitaj, edhe pse e akordoi vetë, i thirrur nga sistemi VAR, kur u kthye në fushë e anuloi.
Përpjekjet e të dyja skuadrave vijuan deri në mbyllje të ndeshjes, por në fund fitues doli Tirana, e cila menjëherë pas vërshëllimës së gjyqtarit, fusha u pushtua nga fansat bardheblu, të cilët festuan me futbollistët e skuadrës së tyre.
