Ashtu si për çdo javë, duke qënë i pranishëm në studion emisionit “Rubrika Sportive” në RTSH, specialist i futbollit, Shkëlqim Muça, ka analizuar ecurinë e javës së 6-të të “Abissnet Superiore” ku sigurisht që vëmendja më e madhe është përqëndruar në derbin e kryeqytetit, atë mes Partizanit dhe Tiranës, fituar nga bardheblutë me rezultatin 2-0.
Sa i përket duelit, Teuta-Vllaznia, luajtur në “Niko Dovana” të premten e kaluar, takim i cili u mbyll në barazim 0-0, Muça, komentoi: “Barazimi pa gola i Teutës me Vllazninë – “Për atë që pamë në fushë mendoj se barazimi ishte rezultati i drejtë. Një ndeshje e menduar mirë nga dy trajnerët, por shumë e varfër në sulm. Dy skuadra që bëjnë punë të mirë deri në metrat e fundit, më pas është e vakët”.
Ndërsa, në lidhje me derbin e kryeqytetit, Muça, tha: “Gjithmonë derbin nuk e parashikon dot, nuk është një ndeshje si gjithë të tjerat. Kampionatin që ka marrë Tirana, e ka marrë vetëm se fitoi derbin. Nuk mund të themi se dominoi njëra apo tjetra, ishte një lojë e hapur, fati e deshi që të shkonte në atë rrugë. Një penallti e humbur, më pas kartoni i kuq. Kur pritej që Partizani të merrte situatën në dorë, ndodhi e kundërta. Në pjesën e dytë Partizani duhet të kishte ndryshuar, të kishte shtuar dhe një sulmues, sidomos në krahune djathtë. Nuk u tregua i guximshëm. Tirana u tregua më e guximshme, nuk u dorëzua, bëri lojën e saj, luajti për ta fituar ndeshjen. Da Silva dhe Hoti janë lojtarë trekuartist për mendimin tim, Skuka luan në një zonë të kufizuar, i duhet më shumë hapësirë. Partizani mori frenat e lojës, u mundua, por ishte i vakët në sulm, ka mangësi në finalizim. Tirana po konsolidohet, ka shumë potencial”.
Nota kritikë ka Muça, për Erzenin, i cili u mund nga Bylisi për javën e gjashtë me rezultat të thellë, 4-1. “Erzeni pësoi katër gola, por edhe me lojë ishte i shpërfytyruar. Më pëlqeu sulmi i Bylisit, ka lojtarë shumë të mirë, e merituan fitoren. Shijakasit nuk më pëlqyen, nuk ishin si në ndeshjet e mëparshme, edhe portieri pastaj ndikoi me gabimet e tij”, tha Muça, ndërsa e mbyll me komentin e çiftit, Laçi-Kukësi, teksa thotë: “Laçi është në një moment shumë të keq, nuk e kam parë asnjëherë në këtë gjendje, pak shpresa ka që mund të ndryshojë. Për Kukësin kjo është një nga ndeshjet më të mira që ka bërë deri tani”.
