Ndryshimi viteve ka sjellë ndryshime të papritura në kampin kuqeblu të volejbollit për femra. Nga një ekip që gjysmën e formacionit të gjashtëshes së parë e kishte me volejbolliste të huaja, tashmë skuadra e drejtuar nga trajneri Besnik Lisha është e tëra me volejbolliste shkodrane.
Tre volejbollistet e huaja që erdhën në merkaton e verës me shumë bujë, rusja Pronina Lyuboc si dhe dy bjelloruset Anna Knyzeva dhe Dayra Auramchyk, i kanë dhënë fund aventurës me Vllazninë.
Paraqitjet e tyre jo në nivelin e kërkuar, duke mos bërë diferencen në fushën e lojës, kjo edhe e pasqyruar edhe në rezultatet e Vllaznisë, e cila, nga një skuadër e trumbetuar për kampione, në mbyllje të fazës së parë përfundoi në vendin e katërt të tabelës së klasifikimit, bënë që drejtuesit të marrin vendimin e largimit të tyre.
Por, përpos mos cilësisë së tyre në fushën e lojës, ardhja e tre volejbollisteve të huaja bëri që në radhët e skuadrës kuqeblu të prishej harmonia brenda grupit, deri në atë masë sa për pakënaqësi të aktivizimit në fushën e lojës, si dhe për probleme të tjera, të kishte largime të volejbollisteve titullare.
Ndërkohë, largimi i të huajave si dhe rikthimi i të larguarave kuqeblu, duket se ka risjellë Vllazninë në gjendjen e mëparshme. Sinjali i parë pozitiv ishte rikthimi i kapitenes Klodeta Zhivani, ndërkohë që një rikthim pozitiv ishte edhe ai i shtatlartes Daniela Kodra, volejbolliste kjo që në fakt, ishte larguar në Itali, por vendosi të rikthehej në fund të vitit.
Por, pas dyshes Zhivani-Kodra, një rikthim shumë i rëndësishëm konsiderohet ai i shuteres Mandisa Kuçi. Për largimin e përkohshëm të Kuçit nga Vllaznia, një volejbolliste potenciale kjo, antare edhe ekipit kombëtar, shkaktare ishin pikërisht raportet me volejbollistet e huaja, për të cilat Kuçi pretendonte të luante përpara tyre në formacion. Kështu që, me largimin e tyre, drejtuesit gjetën gjuhën e bashkëpunimit me shuteren e Vllaznisë për rikthimin e saj në gjirin e Vllaznisë.
Një largim tjetër, shkak i së cilës ishin volejbollistet e huaja, është edhe rasti i talentes Adma Mikolopula, e cila që në fillim të sezonit është bërë pjesë e skuadrës kampione Skëndërbeu. Ndërsa Vllaznia, ka hapur dyert për rikthimin e volejbollisteve të saj, nuk dihet se si do të veprohet me talenten Adma Mikopula, nëse do të ketë një ftesë për të për tu riveshur edhe ajo kuqeblu, apo jo.