Për Anton Shkozën, njeriun që themeloi për herë të parë sportin e Judos në Shkodër dhe Vaun e Dejës, dje ka qënë një ditë e veçantë. Në Vaun e Dejes, aty ku është edhe kryeqëndra e këtij sporti, nën kujdesin personal të Mjeshtrit të Madh të këtij sporti, Anton Shkoza, 30-të vite më parë u hap shkolla e parë e Judos.
Ndaj, në këtë ditë të shënuar, krahas autoriteve vendore dhe qëndrore, i pranishëm ka qënë edhe Ambasadori Japonez i Akredituar në Tirane, z. Takada Mitsuyuki, vendi i të cilit e ka shumë të zhvilluar këtë sport.
Anton Shkoza, ish kampioni i madh i Judos shqiptare, si rezultat i një aksidenti në stërvitje e sipër, prej vitesh vuan të qënurit në paralizë të pjeshshme, por sporti i Judos është jeta e tij.
I konsideruar si legjenda e gjallë e Judos shqiptare, edhe pse është i sistemuar në karrocën e invalidit, falë edhe bashkëpunimit me tre fëmijët e tij, Auroren, Luigjin dhe Xhovanin, të cilëve u ka trashëguar pasionin dhe traditën e këtij sporti, që të tre kampionë dhe trajnerë të suksesshëm, Anton Shkoza vazhdon ta drejtojë me shumë energji dhe pasion këtë sport. Sportistët dhe ekipet e tij të Vaut të Dejës dhe Vllaznisë, janë kampionë të padiskutueshëm kombëtar dhe medalista ndërkombëtarë.
E gjitha kjo, ka befasuar, por në të njëjtën kohë ka motivuar Ambasadorin Japonez, Takada Mitsuyuki, që krahas përgëzimit për sakrificat e bëra në gjithë këto vite nga Anton Shkoza me familjen e tij, t’i afrojë ndihmë dhe mbështetje në bazë materiale dhe aspekte të tjera, të cilat pritet të bëhen realitet në ditët në vazhdim.
Gaspër MARKU