Vllaznia-Apolonia 97-86(23-16, 24-26, 19-14, 16-26, 15-4)
E tillë konsiderohej dhe ashtu u zhvillua sfida në mes Vllaznisë dhe Apolonisë, e vlefshme për javën e dhjetë të Superligës së basketbollit për meshkuj. Një duel që i kishte të gjitha brenda, luftën e fortë sportive, avantazhin e Vllaznisë në tre periodat e para, madje deri edhe në 16 pikë diferencë, barazimin dhe përmbysjen e Apolonisë në minutën e fundit të periodës së katërt që shkoi në plus 3.
Tre pikëshi i Robert Shestanit barazon shifrat në 82-82, por përsëri Apolonia ka shansin e fitores kur ka topin në zotërim dhe me 30-të sekonda lojë të kohës së rregullt në dispozicion që nuk e shfrytëzon. Mandej, është Vllaznia që ka shansin e sulmit të fundit me 11-të sekondat e arta të ndërtimit të një sulmi të mundshëm konkludues, por që edhe ajo nuk arrin të shënojë.
Kështu që, për të përcaktuar ekipin fitues të kësaj ndeshje, sipas rregullores, treshja e arbitrave të kësaj ndeshje dramatike: Gilbert Hoxha, Ani Balliu dhe Ema Ndreu, ftojnë të dyja skuadrat të luajnë 5 minutat shtesë.
Falë edhe tifozërisë së zjarrtë shkodrane që sipas trajnerit të Vllaznisë, Eni Llazani, ishte lojtari i 6-të për to, kuqeblutë janë më të kujdesshëm dhe në dy-tre minutat e para të shtesës shënojnë duke marrë avantazhin, të cilin, falë edhe disa shpërdorimeve të sulmeve fierake, e mirëadministrojnë në mënyrën më të mirë, duke e fituar këtë periodë të pestë shtese prej pesë minutash me rezultatin 15 me 4 që zyrtarizon fitoren me meritë të të gjithë ndeshjen me rezultatin 97-86.
Një fitore ku spikatjen më të madhe e kishin dy amerikanët kuqeblu, Michael Wright dhe Maurice Walton, përkatësisht me 27 dhe 25 pikë, për të vijuar më pas me Ëilkins 19, Arnold 14, Shestani 12.
Pas fitores së javës së kaluar në transfertë me Kamza Basket, edhe ajo me kohë shtesë, kjo është fitorja e dytë radhazi për Vllazninë, e cila nga vendi i fundit në renditje, tashmë është e treta duke i bërë një mbyllje speciale fazës së parë të Kampionatit.
(Video) Pjesa e dytë e ndeshjes, Vllaznia-Apolonia, 97-86. Superliga basket meshkuj. Transmetim direkt me koment i Veriu Sport. Si dhe prononcimi i trajnerit të Vllaznisë Eni Llazani pas ndeshjes.
Gaspër MARKU
