Egnatia e Rrogozhinës po jeton një verë ëndrrash në arenën europiane. Pas fitores 1-0 në Bjellorusi, rrogozhinasit e mbyllin me sukses edhe ndeshjen e kthimit ndaj Dinamo Minsk, duke triumfuar me të njëjtin rezultat dhe siguruar kualifikimin në fazën e tretë të UEFA Conference League, me rezultatin total 2-0.
Heroi i mbrëmjes ishte Ardit Selmani, i cili realizoi një gol spektakolar në minutën e 62-të. Sulmuesi mori topin në hyrje të zonës, bëri një lëvizje të shpejtë për t’u liruar nga mbrojtja dhe lëshoi një goditje të fortë në trekëndësh, duke i çuar tifozët vendas në delir.
Pas golit, Egnatia administroi me kujdes lojën, duke mos i dhënë asnjë mundësi serioze Dinamo Minskut për të ndryshuar fatin e ndeshjes. Me vërshëllimën e fundit, festimet shpërthyen në stadiumin e vogël të Rrogozhinës, ku tifozët përjetuan ndoshta natën më historike në historinë e klubit.
Ky kualifikim e çon Egnatian në fazën e tretë të Conference League, duke e bërë ëndrrën europiane të vazhdojë edhe më tej për kampionët e Shqipërisë.
