Shqipëria do të luajë sot 90’ vendimtare sa i përket aspiratave për kualifikim në Botërorin e 2026-ës. Kuqezinjtë e Sylvinho-s do të ndeshen me Serbinë në Leskovac të vetëdijshëm se vetëm një fitore do të ishte një garanci për pjesëmarrjen në fazën play-off.
Në stërvitjen e fundit të zhvilluar ditën e djeshme u kuptua diçka më shumë rreth strategjisë së brazilianit, i cili duket se do të bëjë një ndeshje në sulm.
Në portë do të jetë titullar Strakosha ndërsa në mbrojtje do të rreshtohen nga e djathta në të majtë: Hysaj, Ajeti, Gjimshiti dhe Mitaj.
Në mesfushë, Silvinjo ka preferuar të ulë në stol Ramadanin dhe vendin e tij, pritet ta marrë Qazim Laçi, i cili do të rreshtohet së bashku me Shehun dhe Asllanin. Aktivizimi i mesfushorit të Spartës së Pragës do të thotë shumë për qëllimet e ekipit kuqezi për këtë ndeshje pasi jo vetem mbulon hapësirat, por edhe ndihmon repartin e avancuar duke sulmuar zonat.
Daku do të udhëheqë sulmin në Leskovac i ndihmuar nga Broja në të djathtë ndërsa në të majtë pritet surpriza e vetme. Braziliani mendon të aktivizojë Uzunin, i cili ka konkurencë të fortë për fanellën e titullarit.
