Emocione pati, por golat munguan në ndeshjet e fundit të javës së 14-të të Superiores. Në Shkodër, Vllaznia nuk arriti të thyejë rezistencën e Vorës, duke u mbyllur sfida pa gola, 0–0, një rezultat që i lë kuqeblutë të zhgënjyer dhe larg objektivit, marrjen e kreut të renditjes.
Ndeshja u karakterizua nga ritëm i lartë dhe raste të krijuara kryesisht nga skuadra vendase, por finalizimi mbeti problemi kryesor. Vllaznia tentoi disa herë të zhbllokonte rezultatin me sulme nga krahët dhe me goditje nga distanca, por porta e Vorës u mbrojt me vendosmëri dhe siguri. Edhe miqtë patën momente të rrezikshme në kundërsulm, duke u treguar të rrezikshëm sa herë u krijua hapësira e duhur.
Ky barazim i mbajti të pandryshuar pozicionet e të dy skuadrave në tabelë. Ekipi i drejtuar nga Edi Martini mbetet në vendin e dytë me 25 pikë, duke humbur një shans të artë për t’u ngjitur përkohësisht në krye. Nga ana tjetër, Vora, me barazimin e marrë në një fushë të vështirë, arrin kuotën e 16 pikëve dhe qëndron në vendin e 7-të, duke treguar se është një skuadër e fortë dhe e disiplinuar.
