Në javën e 24-t të Abissnet Superiore, Dinamo City dhe Flamurtari barazuan 1-1 në sfidën e zhvilluar në “Elbasan Arena”, në një përballje me ritëm dhe tension, ku të dy golat u realizuan brenda 45 minutave të para.
Takimi nisi me intensitet nga të dyja skuadrat, teksa Dinamo kërkonte të shfrytëzonte faktorin fushë, ndërsa Flamurtari u shfaq i rrezikshëm në kundërsulm. Ishin pikërisht vlonjatët që goditën të parët. Pas një ndërhyrjeje të gabuar në zonë, arbitri akordoi penallti për miqtë, ndërsa Bolzan mori përsipër ekzekutimin dhe u tregua i saktë nga pika e bardhë, duke kaluar Flamurtarin në avantazh. Goli i pësuar shtoi presionin mbi dinamovitët, të cilët rritën ritmin dhe zhvendosën lojën në gjysmëfushën kundërshtare.
Skuadra e drejtuar nga Ilir Daja qarkulloi topin me durim, duke kërkuar hapësira në mbrojtjen mike. Përpjekjet e tyre u shpërblyen në minutën e tretë shtesë të pjesës së parë. Pas një aksioni të ndërtuar mirë, topi përfundoi në zonë, aty ku kapiteni Bruno Dita reagoi shpejt dhe e dërgoi në rrjetë, duke rikthyer baraspeshën në momentin më të mirë psikologjik për vendasit.
Pjesa e dytë u karakterizua nga një lojë më e kujdesshme. Dinamo provoi të marrë kontrollin dhe të gjejë golin e përmbysjes, por hasi në një Flamurtar të organizuar mirë në fazën mbrojtëse. Miqtë, nga ana tjetër, tentuan të shfrytëzonin hapësirat në kundërsulm, por pa arritur të konkretizonin rastet e krijuara. Me kalimin e minutave, ritmi ra disi dhe të dy trajnerët ndërhynë me zëvendësime për të freskuar repartet, por rezultati mbeti i pandryshuar deri në vërshëllimën e fundit.
Ky barazim e çon Dinamon në kuotën e 36 pikëve, duke e mbajtur në vendin e katërt dhe në garë për objektivat e sezonit. Në anën tjetër, Flamurtari shkon në 20 pikë dhe vijon të mbetet në vendin e nëntë, pozicion që e mban nën presion në zonën e ftohtë të klasifikimit.
