Edhe pse është afirmuar tashmë si një boksier i suksesshëm profesionist, kampioni i boksit shkodran Arjon Kajoshi, nuk është shkëputur nga boksi olimpik, ku së shpejti do të përfaqësojë Shqipërinë në Kampionatin Europian të Boksit Olimpik që zhvillohet në Sofie të Bullgarisë.
Trajneri i Vllaznisë dhe i kombëtares Lazarin Vila që pritet të shoqërojë Kajoshin në Bullgari bën të ditur se boksierët shkodranë, i janë rikthyer përgatitjeve në palestrën e boksit Vllaznia, ku pas një periudhe pushimi, tashmë fokusi është për dy veprimtari të rëndësishme kombëtare dhe ndërkombëtare.
Duke u ndalur tek konkurimi i Kajoshit, trajneri Vila shprehet optimist që kampioni shkodran pritet të bëjë një përfaqësim dinjitoz në Bullgari.
Ndër të tjera, trajneri Vila sqaron se Kajoshi do të vijojë të jetë pjesë e boksit profesionit, ndërkohë që rregullorja nuk e pengon të aktivizohet paralelisht edhe në boksin olimpik.
Në vijim Vila shton se boksierët e Vllaznisë nën drejtimin e kryetrajnerit Zef Gjoni i janë rikthyer seancave stërvitore në përgatitjet për Kampionatit Kombëtar, i cili në këtë edicion zhvillohet në Tiranë duke pasur si objektiv fitimin e titullit të 28-të kampion.
(Video) Prononcimin e plotë të trajnerit të Vllaznisë në boks, Lazarin Vila, mund ta ndiqni në kanalin tonë zyrtar, Veriu Sport-YOUTUBE.
Gaspër MARKU
