DISA KËSHILLA TË PAKËRKUARA DHE TË PAAUTORIZUARA PËR PRESIDENTIN XHAFERI
Pas ngjarjes së jashtëzakonshme të ndeshjes në Elbasan dhe zhgënjimit të madh që ajo humbje solli te tifozët e Vllaznisë, ndoshta ky është momenti për disa këshilla të pakerkuara dhe të paautorizuara për Presidentin Alban Xhaferi.
President, në momente të tilla mos u nxitoni nga emocionet dhe mos lejoni që zhurma rreth ekipit të cenojë qetësinë dhe unitetin e Vllaznisë. Shmangni provokimet, komentet e panevojshme dhe mbi të gjitha njerëzit që mund të shfaqen si mbështetës, por që me fjalë apo veprime krijojnë përçarje. Vllaznia ka nevojë për bashkim, besim dhe njerëz që ndërtojnë.
Mos u trembni nga vështirësitë. Në rrugën e gjatë të sportit do të ketë pengesa, padrejtësi, zhgënjime dhe momente të vështira. Por njeriu që beson te rruga që ka zgjedhur dhe punon me qetësi e vendosmëri, mund ta kthejë edhe një moment të keq në një mundësi për sukses.
Mos lejoni askënd të fusë duart mes Vllaznisë dhe qytetit të saj. Kritikat janë të nevojshme, por ato duhet të jenë të ndershme, të argumentuara dhe të bëhen me respekt. Ndërsa ata që e duan vërtet Vllazninë duhet të kontribuojnë për ta bashkuar, jo për ta dobësuar.
Dhe një fjalë për FSHF-në
Pas asaj që ndodhi në Elbasan, është e drejtë të kërkohet një reflektim serioz dhe një qëndrim i qartë institucional. Kritika nuk duhet të jetë sulm, por kërkesë për drejtësi, transparencë dhe standard të barabartë për të gjithë.
FSHF-ja duhet të kujtojë se Vllaznia është e Shkodrës, qytetit të madh të kulturës, traditës dhe sportit shqiptar; dhe Shkodra është pjesë integrale e Republikës së Shqipërisë.
Vllaznia nuk kërkon privilegje. Kërkon vetëm atë që i takon çdo klubi: respekt, drejtësi dhe trajtim të barabartë.
Futbolli shqiptar është më i madh se një ndeshje, më i madh se një rezultat dhe shumë më i madh se çdo konflikt momental. Prandaj, edhe kur ka arsye për të kritikuar, le ta bëjmë me qytetari, argument dhe dinjitet.
President Xhaferi, kokën lart! Mbajeni ekipin të bashkuar, ruani qetësinë dhe mos lejoni që askush ta kthejë një moment të vështirë në përçarje. Vllaznia ka një histori, një qytet dhe një popull pas saj.
Sporti është miqësi. Sporti është kulturë. Sporti është respekt.
Dhe mbi të gjitha:
DUART LARG VLLAZNISË!
Jo si kërcënim ndaj askujt, por si një apel qytetar që Vllaznia të lihet të bëjë atë që di më mirë: të luajë futboll dhe të përfaqësojë me dinjitet Shkodrën dhe Shqipërinë.
Përpara President Xhaferi! Përpara Vllaznia!
Ardian ZAGANJORI(ZV.President IPA-Shef i sigurisë së stadiumit “Loro Boriçi” Shkodër
