E kemi theksuar edhe më herët që në Shkodër po rritet një brez i ri i talentuar i sportit të peshëngritjes. Për këtë dëshmojnë edhe vetë rezultatet e arritura gjatë viteve të fundit, kur Vllaznia nën drejtimin e trajnerit Artur Lagja, ka fituar radhazi titujt kampionë me kategoritë e moshave U15, U17, U20.
Ndërkohë, që trofeu më i fundit është ai Kupës së Republikës për kategorinë U-23, ku Vllaznia shpallet kampion duke fituar trofeun përkatës.
Në prononcimin e dhënë për Veriu Sport, kryetrajneri i Vllaznisë Artur Lagja shprehet i kënaqur për ecurinë pozitive të peshëngritjes shkodrane, ku teksa përgëzon talentët Saimir Lagja, Antonino Mullisi, Klevis Bazi që u shpallën kampionë individual në peshët e tyre, kërkon vlerësimin dhe mbështetje e duhur nga strukturat e qeverisjes vendore.
Në vijim, Lagja bën të ditur se me dy kampionët Saimir Lagja dhe Antonino Mullisi, Vllaznia do të përfaqësohet në Kampionatin Europian U23 që do të zhvillohet muajin e ardhshëm në Durrës.
(Video) Prononcimin e plotë të kryetrajnerit të Vllaznisë në peshëngritje, Artur Lagja, mund ta ndiqni në kanalin tonë zyrtar, Veriu Sport-YOUTUBE.
