I startuar pasditen e së enjtes, Kampionati Kombëtar i boksit për të rritur që po zhvillohet në pallatin e sportit “Qazim Dervishi” të Shkodrës, sot ka pasur në program ndeshjet e ditës së dytë.
Në ndryshim nga dita e parë kur lufta sportive ishte prezente në dhjetë peshat përkatëse, në kalendarin e ditës së dytë kanë qënë vetëm katër duele. Nga sa bëjnë të ditur organizatorët, problemet me pandeminë që shoqëruan sportin e boksit gjatë periudhës së kaluar duket se dhanë ndikimin negativ në pjesëmarrjen jo normale të ditës së dytë të kampionatit, që përmban takimet gjysëmfinale.
Gjithësesi, kjo nuk i pengoi boksierët që u ngjitën në ring të jepnin më të mirën e tyre. Mes tyre, ndeshja e peshës deri në 67 kg mes Ibrahim Mezani të Flamurtarit dhe Ralf Nezes së Tiranës, e cila u fitua nga boksieri vlonjat Mezani, spikati si ndeshja më e bukur e kësaj dite.
Rezultatet teknike të ditës së dytë janë këto:
- Pesha 67 kg. Ibrahim Mezani(Flamurtari)-Ralf Neza(Tirana), fiton Mezani.
- Pesha 71 kg. Xhoi Eliazi(Vllaznia)-Enes Agaj(Studenti), fiton Eliazi.
- Pesha 86 kg. Gerian Salliu(Tirana)-Mikel Çullaj(Studenti), fiton Salliu.
- Pesha +92 kg. Nelson Hysa(Vllaznia)-Omer Braho(Flamurtari), fiton Hysa.
Kampionati Kombëtar i boksit për të rritur mbyllet me ndeshjet e ditës së tretë që zhvillohen paraditen e së shtunës ku në program janë 11 duele, prej të cilave do të përcaktohet fati i ekipit kampion për vitin 2021
