Atleti i talentuar shkodran Izmir Smajlaj duket se e ka privatizuar titullin “Kampion Ballkani”. Themi kështu, sepse trofeu i Ballkanit në Kërcim së Gjati, fitohet për herë të gjashtë radhazi nga atleti shkodran, i cili vitet e fundit stërvitet në Tiranë nën drejtimin e trajnerit Gjergj Ruli.
Në garat e zhvilluara për dy ditë me radhë, 4 dhe 5 mars 2022 në Stamboll të Turqisë, për llogari të Kampionatin Ballkanik të Atletikës, i 27-ti nga radha, Smajlaj që shoqërohet si zakonisht nga trajneri i tij, Gjergj Ruli, ka zënë vendin e parë në kërcimin së gjati duke u shpallur kampion i ballkanit.
“I nderuar të jem sërish për të gjashtin vit rradhazi Kampion Ballkanik! Prej vitesh, ky kampionat sa vjen e bëhet më i vështirë, por unë jam krenar që arrij të dal në vend të parë për vendin tim. Falënderimet shkojnë për mbështetësit e sportit tim të bukur, trajnerin Gjergj Ruli, familjen time si dhe Bashkinë Tiranë, Klubin Sportiv Tirana edhe KOKSH të cilët së bashku besojnë çdo herë tek unë dhe objektivat e mia. Gara të tjera na presin këtë 2022! Është vetëm fillimi.”, shkruan Smajljaj në një postim të publikuar menjëherë pas garës në rrjetet sociale.
