Një situatë paradoksale tek Al-Ittihad, aty ku Topi i Artë u sulmua me kritika të ashpra nga tifozët
Karim Benzema po përjeton një situatë të pabesueshme në Al-Ittihad. Pas mbërritjes në verë, me një rrogë faraonike dhe gëzimin e fansave, tashmë lidhja është shkatërruar totalisht. Paraqitjet e dobëta dhe kritikat e ashpra nga tifozët në periudhën e fundit do ta kishin çuar Benzeman në një vendim të bujshëm.
Burime pranë skuadrës dhe lojtarit, në fakt flasin për një arratisje nga Jeddah, qyteti që pret Al-Ittihad. Ish-lojtari i Real Madridit nuk është parë në seancat e fundit stërvitore të trajnerit Marcelo Gallardo. Megjithatë, arsyet dhe qëllimi i kësaj arratisjeje nuk dihen dhe askush nuk e di saktësisht se ku ndodhet sulmuesi francez. Jo vetëm kaq, llogaria e Benzema në Instagram është zhdukur, fshirë totalisht dhe nuk gjendet askund. Një tjetër pjesë që ushqen misterin e kësaj situate.
Benzema shënoi 12 gola dhe 5 asistime në 20 paraqitje për Al-Ittihad, por kjo nuk mjaftoi për të përmbushur pritshmëritë që ishin krijuar për kalimin e tij në skuadrën e Arabisë Saudite. Paraqitjet e tij të tmerrshme në Botërorin e fundit të Klubeve dhe veçanërisht kundër Al Nassr të Cristiano Ronaldos, gjeneruan një ortek kritikash, që çuan pikërisht në këtë situatë paradoksale.
