Edhe dy ndeshje kanë mbetur nga kalendari i ndeshjeve të Kampionatit Botëror, “Katar 2022”. Pas gjysëmfinales së parë, ku Argjentina mund 3-0 Kroacinë duke siguruar e para biletën e finalistes së botërorit, sonte luhet gjysëmfinalja e dytë, Francë-Marok, ndërkohë që të dielen e 18 dhjetorit është rezervuar sfida finalje.
Po, kush do të jetë skuadra sfiduese e Argjentinës në finalen e “Katar 2022”, e planifikuar të luhet në orën 16:00? Favorite në letër, patjetër që është Franca kampione e botës, por kurrësesi nuk duhen anashkuar marokenët, kombëtarja e të cilëve ka qënë surpriza më e bukur e këtij botërori.
Talenti Mbape me shokët e tij të formacionit frances kërkojnë të ruajnë titullin kampion, gjë që nuk ndodhte që nga viti 1962, kur Brazili i Peles u shpall për të dytën herë radhazi kampione Bote. Nga ana tjetër, Maroku e ka shkruar tashmë historinë për kombet afrikane, duke u bërë e para kombëtare nga Afrika që arrin në gjysmëfinalet e Botërorit, por skuadra e Regraguit është “e uritur” për më shumë dhe kërkon të shokojë dhe njëherë botën, kësaj radhe duke shkuar në finale.