Ndonëse njihej për shpirtin e tij luftarak, ai nuk arriti që të triumfonte dhe të mposhte sëmundjen e rëndë e cila prej kohësh i kishte kapluar trupin.
Për të gjithë Thanas Gjata ishte njeriu i fjalës së mirë,bashkëshorti dhe babai shembullor, profesori që gëzonte po njësoj me fëmijët kur shënonin gol.
Me kontributin dhe përkushtimin ndaj sportit,ai la pas një trashëgimi të rëndësishme në Devoll. Brezat që patën fatin ta njihnin,do e kujtojnë me respekt dhe mirënjohje për punën dhe përkushtimin e tij.
Zemërthyer dhe plot pikëllim u përcoll para kohe në banesën e fundit Thanas Gjata,një qytetar i nderuar e respektuar i Bilishtit. Prisnin lajme të mira për shëndetin e tij, prisnin ta shihnim sërish fushave të stërvitjes me futbollistët të vegjël të Devollit, prisnin ta shihnin në shëtitoren e qytetit në atë kalimin e përditshëm pas stërvitjes, prisnin të lexonim komentet e tij në shtypin sportiv, prisnin ta shihnim në kafe me shokët duke diskutuar, prisnin të dëgjonim zërin e tij të fuqishëm e melodioz në këngët qytetare për festa e gëzime familjare.
Sa shumë prisnin, por sëmundja e rrëmbeu pa kthim,dhe pa i besuar ende lajmit të hidhur,e kemi të vështirë të mbledhim këtë buqetë kujtimesh nga jeta e tij e pasur dhe e denjë për ta vendosur te banesa e tij e përjetshme duke u përkulur plot nderim.
Thanas Gjata u lind në Bilisht më 16 janar 1963 në një familje të madhe dhe në një fis që i ka dhënë qyetit,zonës e më gjerë kontributorë të shquar.
Thanasi ndoqi studimet e larta për agronomi dhe filloi punë si specialist në ish-NB Korçë, sektori Dëmbravë. Pas ndryshimit të sistemit, punoi për një kohë në Bashkinë e Bilishtit si shef i shërbimeve, kurse vitet e tjera iu përkushtua sportit si trajner i grupmoshave me një pasion të veçantë, sepse edhe vetë pati qenë futbollit cilësor që nga shkolla 8-vjeçare derisa u grumbullua me ekipin e të rriturve të Devollit nën drejtim e Gjergji Kallços.
Marrëdhëniet e Thanasit me sportin njohën edhe një fushë të re siç ishte ajo e gazetarit sportiv me gazetat qendrore,por duke qenë edhe bashkëpunëtor për gazetat lokale “Bilishti” dhe “Eorde” në vitet 2007-2012.
Ai punoj si sekretar i Kryqit te Kuq për Devollin. Njëkohësisht ka qenë dhe arbitër futbolli për shumë vite ku së bashku me emra si Vasil Angjo etj. Gjata ka kontribuar per disa vite dhe si gjyqtar futbolli.
Shumë prej kolegëve të Thanas Gjatës vlerësojnë pa fund punën e tij prej 25 vitesh si trajner i moshave tek Devolli mbi 15 vite si arbitër futbolli dhe gjithashtu 18 vite pjesë e gazetarisë së shkruar, madje pjesë dhe e emisionit nga njëra ndeshje në tjetrën që trasmetohet në Radio Tirana. Duke nisur nga Rajmond Bedulla, Romeo Cinxifi, Erindi Maneshi, Trifon Meraku, Albert Aliko etj. Madje dhe emra si Vasil Angjo, Gentian Loxe, Donald Dikollari, Sopot Resmeliu e shumë emra të tjerë vlerësojnë punën ndër vite të Thanas Gjatës që nga mosha U9 deri tek U17 e Devollit madje me këta të fundit është shpallur edhe kampion i Kategorisë së Parë për grupmoshat U17.
Portali “Veriu Sport” i shpreh ngushëllimet më të sinqerta familjes Gjata për humbjen e njeriut të tyre të dashur.
Fatos LAMAJ