Atletika shqiptare e ka mbyllur konkurimin në Kampionatin Europian të Atletikës për Sallat e Mbyllura që po zhvillohen në Torun të Polonisë. Ditën e djeshme në garë ishte atleti kuqezi, shkodrani Izmir Smajlaj, i cili në garën e Kërcimit së Gjati nuk mundi të shkojë më tepër se sa shifra 7 metër dhe 69 cm, gjë që e renditi në vendin e nëntë të baterisë së tij duke e lënë jashtë finales për vetem 5 cm. Ndërkohë, shpresat më pas ishin për atletin tjetër shkodran, Franko Burraj, i cili në konkurimin eleminator të paradites së sotme në garën e vrapimit 400 metra zuri vendin e parë në baterinë e tij me kohën 47 sekonda dhe 42 të qindtat duke u kualifikuar në gjysëmfinale.
Kështu, me interes të madh është pritur gara gjysëmfinale duke shpresuar një rezultat kualifikues për Burrajn në mënyrë që atletika shqiptare të vijonte pretendimin për zonën e medaljes. Por, për konkurimin në fjalë që përfundoi pak çaste më parë nuk ka lajme të mira nga Polonia. Koha e Franko Burrajt në këtë bateri ka qënë 47 sekonda dhe 45 të qindtat duke e renditur atë në vendin e pestë të baterisë së tij, gjë e cila e lanë jashtë listës finaliste në këtë garë. Sidoqoftë, renditja e tij në vendin e 14-të mes 49 shteteve pjesëmarrëse, duke pasë parasysh edhe moshën e tij të re, Burraj ka marrë vlerësime pozitive nga ana e specialistëve të atletikes, të cilët kanë besim të plotë se me punën pasionante dhe profesionale në proçesin stervitor nën drejtimin e trajnerit të tij personal, Bruno Rrotani, talenti Franko Burraj do të jetë shumë shpejt mes atletëve më të mirë europiane dhe më gjërë.