Florian Marku nuk është më i pathyeshëm. Boksieri shqiptar, pësoi humbjen e parë në karrierën e tij si boksier profesionist. Marku u mposht nga britaniku Kris Kongo, në duelin për titullin IBO Interkontinental Ëelter në duelin e zhvilluar të dielën në Londër. Një sfidë e luftuar kjo e transmetuar direkt në Klan Plus.
Kongo u përpoq gjatë të gjithë sfidës të mbajë në distancë Markun, falë krahëve të gjatë. Një duel i fortë mes të dyve madje duke i lënë njëri-tjetrit shenja në fytyrë. Me kalimin e raundeve, dueli u bë edhe më i fortë për të grumbulluar sa më shumë pikë me Florian Markun që merrte zemër nga mbështetësit shqiptarë të pranishëm në O2 Arena.
Në raundin e shtatë, Kongo tregoi më qartësi, duke marrë avantazh. Britaniku fitoi më shumë terren me kalimin e raundeve, ndërsa Marku u penalizua nga arbitri i ringut për shkak të goditjeve të parregullta.
Strategjia e Chris Kongo ishte më e saktë, pasi i solli edhe fitoren me pikë me vendim unanim pas 10 raundeve duke marrë edhe titullin Interkontinental të Federatës IBO. Ky ishte dueli i 15-të në ringun profesionist për Florian Markun që deri tani kishte vetëm 13 fitore dhe një barazim..
Kjo është disfata e parë për shqiptarin, pas 14 ndeshjeve, ku nuk njihte humbje. Marku vinte në këtë përballje, pas 13 fitoreve dhe një barazimi, por nuk ia doli të marrë një tjetër sukses.