Laçi-Flamurtari 3-1(Shënues: Melo 45’+4’, 109′, Mjaki 116′ / Dajko 63′ (AU))
Kurbinasit kanë triumfuar me rezultatin 3-1 përballë Flamurtarin në finalen e play-out pas 120 minutash lojë
120 minuta lojë për të zgjidhur enigmën, skuadrën e fundit që do të luajë në sezonin e ardhshëm në Superiore: është Laçi.
Në stadiumin e Laçit, në finalen e play-out-it, kurbinasit kanë arritur të triumfojnë me rezultatin 3-1 përballë Flamurtarit. Sfida u zhbllokua në fundin e pjesës së parë nga një gol i brazilianit Melo, që kaloi skuadrën e drejtuar nga Armando Cungu në avantazh.
Megjithatë, në pjesën e dytë vlonjatët arritën të vendosin barazpeshën me anë të një autogoli të shënuar nga Dajko në minutën e 63-të.
90 minutat u mbyllën në barazim 1-1, për ti lënë radhën shtesës ku kurbinasit siguruan dhe mbijetesën në Superiore. Fillimisht ishte Melo që riktheu avantazhin në minutën e 109 me një penallti, ndërsa në minutën e 116-të Mjaki mbylli të gjitha llogaritë për një fitore 3-1.
Me këtë fitore Laçi mbijeton në Superiore, ndërsa Flamurtari dështon sërish për tu ngjitur në elitë, duhet të nisë nga e para në Kategorinë e Parë.
