Në pritje të përballjes zyrtare të fundjavës, ku ditën e dile do të luajë në Athinë përballë Greqisë për kualifikueset e Kampionatit Botëror “Katar 2022”, kombëtarja e Kosovës zhvilloi mbrëmjen e sotme një ndeshje miqësore me kombëtaren e Jordanisë.
Ndeshja e luajtur në stadiumin “Fadil Vokrri” filloi vrullshëm për dardanët, me synimin dhe dëshirën e madhe për ta zhbllokuar rezultatin qysh në minutat e para, por presioni ndaj kundërshtarit nuk solli rezultat.
Në anën tjetër, mysafirët qysh në rastin e parë arritën të shënojnë nëpërmjet Baha Faisal, në minutën e 18-të. Pas pësimit të golit Dardanët në vazhdimësi ishin këmbëngulës për ta rikthyer baraspeshën në rezultat, mirëpo nuk ishin konkret para portës mysafire.
Ndërkaq, në minutën e 85-të Jordania realizoi edhe golin e dytë, kur një kundërsulm të shpejtë e finalizoi Hamza al Daradreh.
Kosova, të dielën, e zhvillon ndeshjen e radhës në Athinë, ku do të përballet me Greqinë, në ndeshjen përmbyllëse të kualifikimeve për Kampionatin botëror “Katari 2022”.
