Shqipëria: Selmani, Veseli, Mihaj, Bajrami, Hysaj, Hoxhallari, Çokaj, Ramadani, Çekiçi, Seferi, Vrioni. Trajner: Reja
Estonia: Igonen, Kusk, Paskotsi, Luka, Pum, Sumets, Petson, Miller, Pari, Sorga, Zenjov. Trajner: Haberli
Pas një barazimi në transfertë me Islandë, dhe humbjen në shtëpi me Izraelin, ndeshje këto të vlefshme për Ligën e Kombeve, kuqezinjtë e kombëtares shqiptare të drejtuar nga trajneri Edi Reja luajtën sot miqëren duke pasur përballë kombëtaren e Estonisë.
Një miësore kjo, të cilën stafi teknik e ka shfrytëzuar për të bërë rotacion në formacionin e parë duke i dhënë mundësi lojtarëve më të rinjë të marrin minutat e duhura në fushën e lojës.Trajneri Reja ka paraqitur një formacion me shumë ndryshime, një skuadër eksperimentale, që ka bërë detyrën e saj deri në metrat e fundit, aty ku sëmundja e vjetër, mungesa e saktësisë, vazhdon të na ndjekë.
Takimi i luajtur hënën në Stadiumin “Arena Kombëtare” duke filluar nga ora 18:00 ka parë një pjesë të parë të vakët në raste, me një qarkullim dhe kontroll më të madh topi nga ana e kuqezinjve dhe një dialog i gjatë me lojën mbrojtëse të përfaqësueses estoneze, por mungojnë rastet e pastra për shënim.
Seferi është gjithnjë kërkues para portës kundërshtare, por pa saktësinë e duhur, kjo dhe për meritë të kundërshtarit, ndërsa në minutën e 32-të, Vrioni ka mundësinë më të mirë, por godet mbi shtyllën horizontale të portës mike. Pjesa e parë mbyllet kështu me rrjeta të paprekura, me kuqezinjtë më kërkues dhe estonezët që mbrohen mirë.
Pjesa e dytë do të shohë trajnerin Edoardo Reja të fusë në fushën e lojës Uzunin dhe Brojën dhe loja do të ndryshojë dukshëm. Menjëherë është Çekiçi që godet rrezikshëm nga një goditje dënimi, portieri i Estonisë bën mrekullinë në minutën e 46-të, ndërsa 7 minuta më pas, përsëritet skena dhe përsëri Çekiçi godet, por përsëri Igonen devijon një tjetër goditje dënimi e ekzekutuar mjeshtërisht nga sulmuesi kuqezi, por rezultati mbetet i bardhë 0-0.
Edhe pse pritej një gol në portën kundërshtare, është Estonia që në minutën e 59-të rrezikon seriozisht portën kuqezi, është Poom që godet me kokë, por pa arritur të gjejë kuadratin. Në minutën e 73-të, Uzuni provon me një goditje të zgjuar, por pa sukses. 15 minutat e fundit e lojës do të shohë Kombëtaren të ngulmojë, por Estonia mbrohet mirë dhe gjithçka do të mbyllet me një barazim pa gola.
