Tirana 3–0 Korabi (Lulaj 28′, Latifi 39′, Hoxhallari 47′) ,Egnatia 2–0 Lushnja (Fernando 45′, Gjata 83′), Erzeni 2–1 Bylis (Kahrimanovic 24’p, Mihana 28′ / Kibe 75′), Kukësi 1–0 Elbasani (Rashiti 91′)
Janë mbyllur 6 ndeshjet e para të fazës së 1/8-ave të Kupës së Shqipërisë. Nuk ka surpriza teksa edhe Tirana, Egnatia, Erezni dhe Kukësi kanë arritur të bëjnë “detyrën”, në raundin e 1/8-ve, të Kupës së Shqipërisë, duke mundur kundërshtarët e tyre, për të avancuar në një fazë më të nxehtë të kompeticionit, ku natyrisht mund të rezervohen edhe përballje mes favoritëve.
Në “Selman Stërmasi”, bardheblutë e Julian Ahmatajt kanë bërë detyrën ndaj dibranëve, të Korabit, duke i mundur këta të fundit, me rezultatin e pastër 3 me 0. Fitorja mund të thuhet që u vulos, që në pjesën e parë të sfidës falë golave të Bruno Lulajt e Liridon Latifit, në minutat 28’ e 39’, ndërsa rezultatin e përgjithshëm e hipotekoi kapiteni, Erion Hoxhallari, në minutën e 47’.
Egantia triumfoi pastër në “Arena Egnatia” ku mundën Lushnjën, me rezultatin, 2 me 0, pas golit të brazilianit Fernando, në sekondën e fundit të pjesës së parë dhe “bomberit”, Mario Gjata, i cili çoi topin në rrjetë, në minutën e 83’-të, për të shënuar kështu në përballjen e dytë radhazi.
Në përballje të tjera, shijakasit e Erzenit mundën me rezultatin e ngushtë, 2 me 1, ballshiotët e Bylisit, pas golave të Amir Kahrimanovic e Redon Mihanës, në minutat 23’ e 28’, ndërsa për miqtë shënoi Kibe në të 75’-tën. Kukësit mposhti Elbasanin, falë një goli, të Rashitit, në “frymën e fundit” të sfidës, ndërsa Laçi mposhti me rezultatin minimal, 1 me 0, Dinamon falë një autogoli të të sapo afruarit në merkato, Stivian Janku.
Kështu, në raundin e radhës kalojnë skuadrat e Egnatias, Erzenit, Kukësit, Laçit, Partizanit e Tiranës, ndërsa për të plotësuar 8-shen çerek-finaliste do të duhet përfundimi i sfidave, të orës 17:00, Vllaznia-Flamurtari e Teuta-Skënderbeu, ku në rast fitoreje të “Kuqebluve” në “Loro Boriçi”, trofeu i Kupës së Shqipërisë qëndron në Kategorinë Superiore.
