Kuqeblutë po shtojnë forcat në repartin ofensiv, në prag të përballjeve të raundit të dytë ndaj Vikingur. Klubi shkodran ka siguruar huazimin e sulmuesit ganez Çarls Bismark nga Skënderbeu,si një alternativë e menjëhershme për repartin e avancuar.
Burime pran klubit bëjnë të ditur se marrëveshja mes palëve është mbyllur dhe zyrtarizimi pritet brenda pak orësh. 24-vjeçari pritet të jetë pjesë e ekipit vetëm për dy sfidat e Kupave të Europës,duke zëvendësuar sulmuesin Kevin Dodaj,i cili u transferua kohët e fundit te CSKA Sofia.
Bismark,që ka zhvilluar 32 ndeshje me fanellën e Skënderbeut,vjen te Vllaznia si një element që sjell ritëm,eksperiencë dhe cilësi në sulm. Stafi teknik e ka vlerësuar për aftësitë e tij në zonë dhe shprehet optimist për impaktin që ai mund të ketë në përballjet e rëndësishme ndaj islandezëve të Vikingur.
Sulmuesi do të vihet menjëherë në dispozicion të trajnerit për përgatitjet e ndeshjeve europiane,me objektivin për të dhënë ndihmën e tij që në debutim.
Fatos LAMAJ
