Vllaznia e Shkodrës e drejtuar nga trajneri Nikolin Leka vazhdon të jetë e pathyeshme në Kampionatin Kombëtar të futbollit për femra, kategoria Superiore. E tillë ka qënë edhe në javën e 19-të. Kur skuadra kuqeblu mundi me rezultatin e thellë 5-0 Teutën e Durrësit.
Ndeshja e luajtur në stadiumin “Reshit Rusi” të Shkodrës, kishte për protagonist golashënuesen më të mirë të skuadrës kuqeblu, Megi Doçi, e cila në këtë përballje tundi plot katër herë rrjetën durrsak, ndërkohë që goli tjetër për Vllazninë u shënua nga Luçije Gjini.
Me fitore e ka mbyllur këtë javë edhe ekipi tjetër i Shkodrës, Atletik Club Shkodra. Skuadra e drejtuar nga trajneri Elis Legata, fitoi me shifrat 2-5 në transfertë ndaj Lushnjes, në një ndeshje të çmendur që përfundoi në barazimin 2-2 pjesën e parë, ndërsa në fraksionin e dytë shkodranet shënuan tre gola të tjerë, duke marrë kështu një tre pikësh mjaft me vlerë. Golat për ekipin Atletik Club Shkodra u shënuan nga Esmeralda Shpella, Leoselda Stalaj, Iris Armoku(2) dhe Erilda Kurbasha.
Asnjë surprizë nga ekipet e mëdha të kampionatit, me Tiranën që është rikthyer te fitorja këtë javë, pasi mundi në derbi Tirana AS me rezultatin 6-1, në një ndeshje që foli për fitueset, të cilat shënuan pesë gola që në pjesën e parë.
Kjo është një fitore mjaft e rëndësishme për vajzat bardheblu të cilat ruajnë vendin e tretë në klasifikim.
Një fitore të rëndësishme këtë javë mori edhe ekipi tjetër i kryeqytetit, Partizani, që fitoi ndaj Murlanit me shifrat 1-0. Goli i vetëm i sfidës që i dha tre pikët të kuqeve u shënua në minutën e 76-të nga Begallo. Partizani gjendet tashmë në vendin e katërt në kampionat me 36 pikë të grumbulluara në 19 javë.
Vllaznia dhe Apolonia, dy “kundërshtaret” e përjetshme morën nga një fitore të thellë në ndeshjet respektive, teksa shkodranet mundën Teutën në shtëpi me rezultatin 5-0 ndërsa fieraket fituan 7-0 ndaj Kinostudios.
Ndeshjet e javës së 19-të:
Tirana 6-1 Tirana AS
Partizani 1-0 Murlani
Kinostudio 0-7 Apolonia
Vllaznia 5-0 KF Teuta
Lushnja 2-5 Atletik Club
Pas javës së 19-të, tabelën e klasaifikimit e kryeson Vllaznia me 46 pikë. Në vend të dytë renditet rivalja kryesore, Apolonia e Fierit me pesë pikë më pak.
