Presidenti i FSHF-së, Armand Duka zhvilloi sot një takim kortezie me Ministrin e Punëve të Jashtme dhe Tregtisë së Hungarisë, z. Péter Szijjártó, i cili ndodhet për një vizitë zyrtare të Tiranë.
Në takim u diskutua për marrëdhëniet e shkëlqyera me Hungarinë dhe Presidenti Duka e njohu Ministrin Péter Szijjártó me projektet e mëdha të FSHF-së, që kanë transformuar ndjeshëm futbollin shqiptar në vitet e fundit.
Ministri Péter Szijjártó nga ane e tij përgëzoi Presidentin Duka për zgjedhjen në postin e Zv.Presidentit të UEFA-s, duke e cilësuar këtë vendim historik si një rezultat të shkëlqyer e një sukses domethënës në diplomacinë sportive për Shqipërinë, por edhe për të gjithë rajonin e Ballkanit.
Ministri hungarez theksoi se nën lidershipin e Presidentit Duka, futbolli shqiptar është zhvilluar shumë në dy dekadat e fundit.
Gjithashtu, ai vlerësoi punën e shkëlqyer të Presidentit Duka që nga vitit 2021 si Konsull i Hungarisë në Shqipëri, duke forcuar miqësinë dhe bashkëpunimin mes dy vendeve tona.
Presidenti Duka, pasi e falënderoi Ministrin Szijjártó për vlerësimin, e siguroi se bashkëpunimi do të intensifikohet edhe më shumë në të ardhmen.
