Kevin Dodaj, talenti 19 vjeçar që po rritet te Vllaznia po kalon një formë të shkëlqyer sportive. Është kjo arsyeja që stafi teknik me në krye trajnerin Thomas Brdariç i besoi aktivizimin si titullar në formacionin kuqeblu për sfidën e javës së parë të Superiores, Partizani-Vllaznia. Një ndeshje kjo, që sipas edhe specialistëve të futbollit, Kevin Dodaj ishte ndër më të mirët në fushën e lojës. E veçanta e tij në këtë ndeshje kishte të bënte me faktin se krahas veprimeve plot fantazi në repartin e sulmit, Dodaj është parë shumë herë të mbrojë mjaft mirë edhe në prapavij duke thyer jo pak aksionet e rrezikshme të Partizanit.
Është kjo arsyeja që vetë faqja zyrtare e Klubit të Futbollit Vllaznia, mesditën e sotme i ka dedikuar Kevin Dodajt një postim special futbollistit të ri që shkëlqeu edhe në Kupat e Europës me supergolin e shënuar për ngjyrat e Vllaznisë në transfertën e largët të Islandës përballë Valur Rejkjavik të Islandes.
“Një start si titullar në ndeshjen e parë të kampionatit, motivi i duhur për Kevin Dodajn, lojtarin e dalë nga Akademia kuqeblu për të bërë mirë me ekipin e parë të Vllaznisë në sezonin e ri. #kfvllaznia #dodaj”, shkruhet në faqen zyrtare të KF Vllaznia për Dodajn, çka tregon se drejtuesit tashmë talentin e sulmit kuqeblu e kanë në qëndër të vemendjes, ndaj edhe nuk hezitojnë ta promojnë mediatikisht.
Ndërkohë, për t’u theksuar është se talenti Kevin Dodaj ka marrë vemendjen e duhur edhe të ish futbollistit të mirënjohur shkodran, Auron Miloti, një futbollist ky që ka luajtur edhe me Vllazninë dhe Tiranën, dhe sot është në cilësinë e drejtorit të sporteve pranë Bashkisë Shkodër.
Duke folur për prag klasiken Vllaznia-Tirana, Miloti, teksa shprehet optimist për fitoren e Vllaznisë, ndalet edhe tek Kevin Dodaj duke, ku pasi shpreh simpatinë ndaj tij, uron që ai shënojë të dielën ndaj Tiranës dhe t’i japë fitoren Vllaznisë.
“Vllaznia-Tirana e së dielës ndoshta nuk vjen me dy skuadrat në nivelet e tyre më të larta, por mbetet një nga sfidat më të bukura të Superiores. Jo më kot konsiderohet edhe “Klasikja e Shqipërisë”. Më pëlqen Kevin Dodaj, do të doja që të shënonte ai si një futbollist i ri. E po ashtu t’i dhuronte fitoren Vllaznisë kundër Tiranës.”, shprehet Miloti.
