Pas 6 javëve të para Vllaznia kryeson renditjen, duke dhënë sinjale të qartë se këtë sezon është një kandidate e fortë për titullin kampion.
Edhe pse nuk ka përfunduar akoma faza e parë e kampionatit, me atë që skuadra e trajnerit Tomas Brdariç ka treguar në fushë, sidomos ndaj Egnatias kampione në fuqi, duket se trofeu i lakmuar prej vitesh në Shkodër është plotësisht i arritshëm. Presidenti i Vllaznisë, Alban Xhaferi, ka folur për startin e mirë të skuadrës së tij, që kryeson e vetme me 13 pikë. Në një intervistë për “RTSH Shkodra”, kreu i klubit shkodran ka komentuar lëvizjen e mesfushorit Rejan Alivoda drejt Emirateve të Bashkuara Arabe, si dhe ndeshjen e së shtunës me Dinamon në transfertë. Ai ka theksuar se Vllaznia kërkon vetëm 3 pikët në Elbasan kundër Dinamos.
Z.Xhaferi, sa i kënaqur jeni me startin e Vllaznisë?
Mendoj se kemi bërë një fillim të mirë të sezonit. Kam rezerva për dy ndeshje, ato ndaj Skënderbeut dhe ndaj Tiranës, sepse nuk ishin ndeshjet që ne pretendonim. Mendoj se starti është i mirë, kemi fituar me Egnatian kampione në fuqi.
Si e shikoni vazhdimësinë?
Na mbetet tani që të vazhdojmë me këtë ritëm dhe të jemi në këto pozita që kemi në renditje.
Si do ta komentonit shitjen e Alivodës?
Me transferimin e Alivodës mendoj se kemi bërë gjënë e duhur. Ishte lëvizja e dytë brenda pak muajve, pas lëvizjes së Smajlit në drejtim të Ballkanit, një tjetër ekip me shumë emër jo vetëm në Kosovë, por edhe në kompeticionet europiane.
Përballë këtë javë do të jetë Dinamo. Si e prisni këtë ndeshje?
Dinamo është një skuadër me investime të mëdha në këtë periudhë. Por kjo nuk do të na pengojë që të udhëtojmë vetëm për fitore në këtë transfertë.
Stadiumi “Loro Boriçi” do të jetë i mbyllur për afro një muaj…
Sezonin e kaluar fusha e stadiumit “Loro Boriçit ka qenë optimale dhe për këtë falënderoj edhe bashkinë për mbështetjen e duhur në këtë drejtim.
Admir URUÇI
