Iliria-Vllaznia B, 1-0
Formacioni i Vllaznisë: Jukaj, Brahimi, Pusi, Bajrami, Spahija, Tafili,Zaganjori, Kahrimanoviç, Maliqi, Halili, Podrimcaku. (U aktivizuan: Selmani, Kubazi, Rroku, Shimaj, Kapllani). Trajner: Tomas Brdariç
Ashtu siç ishte paralajmëruar, ndërprerjen e kampionatit për shkak të ndeshjeve të ekipit kombëtar me Çekinë dhe Gjeorgjinë, Vllaznia e shfytëzoj me zhvillimin e një ndeshje miqësore.
Dhe, për këtë zgjodhi ekipin e kategorisë së dytë, Iliria e Fushë Krujës. Në pamundësi për ta luajtur në stadiumin “Loro Boriçi” pasi tapeti i gjelbërt i është nënshtruar proçesit të rimbjelljes së barit, ndeshja në fjalë është luajtur në stadiumin “Redi Maloku” të Fushë Krujës.
Një miqësore kjo që për trajnerin Thomas Brdariç dhe stafin e tij ka qënë krysisht në funksion të lojtarëve të stolit, për t’i dhënë minutat e duhura në fushën e lojës. Kështu, e konsideruar si Vllaznia B, në portë ishte Jukaj, për të vijuar me mbrojtjen Brahimi, Pusi, Bajrami dhe Spahija.
Në mesfushë janë aktivizuar,Tafili, Zaganjori, Podrimcaku dhe Maliqi, për të vijuar me repartin sulmues, Kahrimanoviç dhe Halili. Në pjesën e dytë ka patur vend për aktivizimin edhe të Selmanit, Kubazit, Rrokut, Shimajt dhe Kapllanit.
E gjithë ndeshja është mbyllur me fitoren e ekipit vendas Iliria me rezultatin 1 me 0. Por, përpos rezultatit, që mund të ishte edhe ndryshe falë rasteve të shpërdoruara nga futbollistët kuqeblu, për trajnerin Brdariç me rëndësi ka qënë testi për lojtarët e stolit të ekipit të parë si dhe një pjesë e ardhur edhe nga Vllaznia U21.
Dhe, për një pjesë të tyre, njëshi i pankinës kuqeblu ka mbetur i kënaqur duke marrë prej tyre sinjale pozitive për vazhdimësinë, ndaj të cilëve priten hapësira aktivizimi edhe në skuadrën e parë.
