Specialisti i futbollit Redi Jupi, duket tepër i zhgënjyer nga performanca e Vllaznisë në këtë edicion. Në analizën e tij, Jupi deklaroi se është i habitur që skuadra shkodrane ka marrë aq shumë pikë. Sipastij Vllaznia është skuadër pa bosht.
“Asnjëherë nuk më ka bindur Vllaznia. Unë mendoj që Vllaznia ka bërë mirë deri tani me pikët që ka. Nuk ka bërë mirë në aspektin e performancës dhe lojës që ka treguar, por ka grumbulluar shumë pikë. Për mua është surprizë që ka aq shumë pikë, me atë ç’ka shikoj në fushë te Vllaznia.
Mua nuk më bind personalisht. Është skuadër pa një bosht të përcaktuar mirë, pa lojtarë që të marrin përgjegjësi në momente të caktuara.
Me dobësi të theksuara në disa reparte, të cilat mbase nuk do i nxjerrin probleme për të shkuar në Final 4, por për ta projektuar në dy skuadrat finale që do të luftojnë për titullin, nuk e shikoj. Gjithmonë kam parasysh imazhin e kampionatit të vjetshëm, që Partizani dhe Egnatia ishin dy skuadrat më të mira dhe kampionati përfundoi me një “happy end”, skuadra më e mirë e fitoi kampionatin. Vllazninë nuk e shikoj te ky rrugëtim. Mund të ndodhi komplet e kundërta, por unë nuk e shikoj”, u shpreh Redi Jupi për emisionin “Rubrika Sportive”.
