Java e 25-të e Albi Mall Superligës së Kosovës në futboll është përmbyllur me dy duele interesante, që u zhvilluan të dielën, ku Llapi ka shënuar fitore ndaj Suharekës, ndërsa Feronikeli 74 dhe Malisheva i ndanë pikët.
Në stadiumin “Zahir Pajaziti” në Podujevë, skuadra vendase ka shënuar fitore tejet të rëndësishme në garën për t’iu shmangur zonës së rrezikshme, duke e mposhtur Suharekën, me rezultat 2:0. Golat e fitores për llapjanët i realizoi Ardit Tahiri, fillimisht në minutën e 32-të për epërsinë 1-0, e më pas në minutën e 82-të për ta vulosur rezultatin përfundimtar 2-0. Pavarësisht se Llapi mbeti me një lojtar më pak pas përjashtimit të Ramadanit me karton të kuq në minutën e 43-të, skuadra llapjane arriti ta menaxhojë mirë lojën dhe të sigurojë tri pikë të rëndësishme. Tani Llapi ka 29 pikë dhe e zë vendin e tetë, derisa Suhareka është një pozitë më poshtë me pikë të njëjta.
Ndërkohë, në stadiumin “Rexhep Rexhepi” në Drenas, Feronikeli 74 dhe Malisheva u ndanë baras, pa gola. Një nga mundësitë më të mira për gol i takoi Drilon Hazrollajt të Malishevës në minutën e 6-të, por ai nuk ishte i saktë nga pika e bardhë.
Më herët, Dukagjini dhe Gjilani arritën të sigurojnë barazime në minutat e fundit të takimeve përkatëse para tifozëve të vet ndaj Dritës, përkatësisht Prishtinës.
Ndeshja ndërmjet Dukagjinit dhe Dritës përfundoi me rezultat 1:1, pasi Hekuran Berisha shënoi në minutën e 92-të, duke i siguruar skuadrës së tij një pikë të rëndësishme në garën për mbijetesë.
Pjesa e parë u karakterizua nga një lojë e fortë, ku Drita arriti të kalojë në epërsi me golin e Denys Kostyshyn në minutën e 39-të, pas një asistimi nga Iljasa Zulfiut.
Në pjesën e dytë, vendasit shtuan presionin dhe në sekondat e fundit arritën të barazojnë me golin e Hekuran Berishës, duke shmangur humbjen në shtëpi.
Një tjetër barazim dramatik u regjistrua në Gjilan, ku skuadra vendase arriti të shmangë humbjen ndaj Prishtinës falë golit të minutës së 92-të.
Prishtina kaloi në epërsi në pjesën e parë pas një autogoli të Senad Jaroviqit në minutën e 23-të. Megjithatë, Gjilani nuk u dorëzua dhe vazhdoi të kërkonte golin e barazimit, i cili erdhi në sekondat e fundit me një goditje me kokë të Roganoviqit. Goli fillimisht u rishikua nga VAR dhe më pas u pranua nga gjyqtari Gramos Shala.
Ky rezultat lë Prishtinën ende pa fitore në dhjetë ndeshjet e fundit, por një pikë si mysafire është e rëndësishme.
Pas javës së 25-të, AlbiMall Superliga e Kosovës kryesohet nga Drita me 54 pikë, e ndjekur nga Ballkani dhe Malisheve me 43 dhe 41 pikë, ndërkohë që mbyll renditjen Ferronikeli me 14 pikë.