FC Malisheva dhe FC Prishtina kanë pësuar humbje në ndeshjet e para të raundit të parë kualifikues në garat evropiane, të zhvilluara të enjten mbrëma.
Malisheva, e cila e përfaqëson Kosovën në Ligën e Konferencës, është mposhtur me rezultat minimal 1:0 nga Vikingur Reykjavik, në stadiumin “Fadil Vokrri” në Prishtinë.
Goli i vetëm i takimit u shënua në minutën e dytë shtesë të pjesës së parë, kur sulmuesi islandez, Nikolaj Hansen, realizoi me kokë pas një ndërprerje në afërsi të zonës. Përkundër përpjekjeve dhe lojës së hapur nga të dyja skuadrat, Malisheva nuk arriti të konkretizojë rastet, ndërsa loja në ajër rezultoi vendimtare për ekipin mysafir, për shkak të shtatlartësisë së futbollistëve.
Kjo është paraqitja e dytë radhazi e Malishevës në garat evropiane. Skuadra do të përpiqet të kthehet me rezultat pozitiv në ndeshjen e kthimit, që zhvillohet pas një jave në Reykjavik.
Ndërkohë, fituesja e Kupës së Kosovës, FC Prishtina, ka pësuar humbje 4:0 në udhëtim ndaj skuadrës së njohur moldave, Sheriff Tiraspol, në ndeshjen e parë të raundit të parë kualifikues në Ligën e Evropës.
Skuadra vendase e nisi ndeshjen furishëm, duke kaluar në epërsi që në minutën e 11-të përmes Bayalës, i cili realizoi edhe golin e dytë në minutën e 19-të, pas një gabimi në mbrojtjen prishtinase.
I njëjti futbollist kompletoi hat-trikun në minutën e 74-t, ndërsa pesë minuta më vonë Odede vulosi fitoren me rezultatin 4:0.
Ndeshja e kthimit zhvillohet pas një jave në stadiumin “Fadil Vokrri” në Prishtinë, por përmbysja e rezultatit do të jetë një mision jashtëzakonisht i vështirë për bardhekaltrit e kryeqytetit.
